اسلا م آباد (نیوز ڈیسک ) محکمہ موسمیات نے پیشگوئی کی ہے کہ ملک کے مختلف حصوں میں آندھی اور گرج چمک کے ساتھ بارش ہو سکتی ہے۔رپورٹ کے مطابق بالائی خیبرپختونخوا، اسلام آباد، خطۂ پوٹھوہار، کشمیر اور گلگت بلتستان میں بارش کے امکانات موجود ہیں، جبکہ دیگر بیشتر علاقوں میں موسم خشک اور گرم رہے گا۔اسلام آباد اور اس کے گردونواح میں آندھی کے ساتھ بارش متوقع ہے۔ اسی طرح راولپنڈی، مری، گلیات، جہلم، اٹک، چکوال، لاہور، سیالکوٹ، نارووال، گجرات اور گوجرانوالہ میں بھی بارش برسنے کی پیشگوئی کی گئی ہے۔

بالائی خیبرپختونخوا کے اضلاع دیر، سوات، کوہستان، شانگلہ، بٹگرام، مانسہرہ، ایبٹ آباد، ہری پور، باجوڑ، مہمند، اورکزئی اور خیبر میں بھی گرج چمک کے ساتھ بارش ہو سکتی ہے۔بلوچستان کے جنوبی حصوں میں موسم جزوی طور پر ابرآلود رہنے کا امکان ہے جبکہ سندھ کے ساحلی علاقوں میں کہیں کہیں ہلکی بارش کی توقع ظاہر کی گئی ہے۔ آزاد کشمیر اور گلگت بلتستان میں بھی تیز ہواؤں کے ساتھ بارش کا امکان ہے۔محکمہ موسمیات کے مطابق گزشتہ 24 گھنٹوں کے دوران ملک کے زیادہ تر حصوں میں موسم خشک اور گرم رہا، تاہم اسلام آباد، بالائی پنجاب، خیبرپختونخوا کے شمالی علاقوں اور کشمیر میں بعض مقامات پر بارش ریکارڈ کی گئی۔