اسلام آباد (آئی این پی )سی ڈی اے مزدور یونین کے ساتھ طے شدہ معاہدے کے تحت سی ڈی اے انتظامیہ نے عیدالفطر کے موقع پر تمام مسلم ملازمین بشمول ڈیلی ویجز،کنٹریکٹ اور مسٹررول ملازمین کے لیے عید بونس کی منظوری دے دی جسکا باقاعدہ نوٹیفیکیشن جاری کردیا گیا ہے،نوٹیفیکیشن کے تحت19جون 2017 ء بروزسوموارکو تمام ملازمین(سکیل نمبر01تا 16نان گزیٹیڈ) کو ایک موجودہ بنیادی تنخواہ اور گزیٹیڈ
ملازمین کو آدھی موجودہ بنیادی تنخواہ بطور عیدبونس بمعہ تنخواہ اور ریٹائرڈ ملازمین کو پنشن ادا کی جائے گی،نوٹیفکیشن کے مطابق سی ڈی اے کے کنٹریکٹ ،ڈیلی ویجزاور مسٹررول ملازمین کو انکے سکیل کے مطابق عید بونس کی ادائیگی کی جائے گی ،نوٹیفکیشن جاری ہوتے ہی سی ڈی اے ملازمین میں خوشی کی لہر دوڑ گئی اور وہ مرکزی یونین آفس میں جمع ہو گئے اور اپنی بھرپور خوشی کا اظہار کیا،اس موقع پر خطاب کرتے ہوئے سی ڈی اے مزدور یونین (سی بی اے ) کے جنرل سیکرٹری چوہدری محمد یسیٰن نے میئروچیئرمین سی ڈی اے شیخ انصر عزیز ،ممبر ایڈمنسٹریشن محمد یاسر پیرزادہ، ممبر فنانس فہدہارون اور سی ڈی اے انتظامیہ کا شکریہ ادا کیا اور کہا کہ اس سے یقیناًسی ڈی اے کے غریب ملازمین کی خوشیوں میں اضافہ ہو گا اور اس مہنگائی کے دور میں بہتر انداز میں اپنا مذہبی تہوار منا سکیں گے ،انھوں نے کہاکہ سی ڈی اے مزدور یونین نے ہمیشہ ملازمین کے حقوق کی جدوجہد کی اور اپنی افہام و تفہیم کی پالیسی کو جاری رکھتے ہوئے ہمیشہ انتظامیہ سے گفت و شنید کے ذریعے محنت کشوں کے جائز مطالبات کو منوایا ،اس موقع پر انھوں نے چیئرمین سی ڈی اے اور ممبر ایڈمنسٹریشن سے مطالبہ کیا کہ ڈیلی ویجز،کنٹریکٹ اور مسٹررول ملازمین کی اس بابرکت مہینے میں فوری طور پر مدت ملازمت میں توسیع کی جائے تاکہ یہ ملازمین عید کی خوشیوں میں برابر کے شریک ہو سکیں ۔
