اسلام آباد(مانیٹرنگ ڈیسک) گاڑیاں رکھنے والوں کیلئے خوشی کی خبر آ گئی۔ اب گاڑیاں چوری نہیں ہوں گی کیونکہ پنجاب حکومت نے اس سلسلے میں ایک قابل تحسین اقدام اٹھا لیا ہے۔ رپورٹ کے مطابق صوبے میں گاڑیاں چوری کرنے کی وارداتوں میں اضافہ ہوتا جا رہا تھا جس سے نمٹنے کیلئے پنجاب حکومت ایکشن میں آ گئی۔ پنجاب کے تمام اضلاع کے محکمہ ایکسائز نے نئی الیکٹرانک سسٹم پر مبنی نمبر پلیٹ متعارف کروانے کا فیصلہ کر لیا ہے۔ محکمہ ایکسائز کے ذرائع کے مطابق گاڑی کی فرنٹ سکرین پر نمبر پلیٹ آ ویزاں کی جائے گی جس میں سم کارڈ لگایا جائیگا۔ اس سم میں گاڑی کے مالک کا نام ، پتہ، انجن نمبر، چیسز نمبر اور دیگر معلومات فیڈ کی جائیں گی۔ شہر کے داخلی اور خارجی راستوں پر الیکٹرونک راڈار لگائے جائیں گے ۔
ایکسائز ماہرین کے مطابق اگر اس نمبر پلیٹ کو ٹمپرڈ کرنے یا اسے اتارنے کی کوشش کی جائے گی تو محکمہ ایکسائز کے کمانڈ اینڈ کنٹرول سسٹم کو فوری طور پر اطلاع مل جائے گی اور گاڑی چوری کرکے شہر سے باہر لیجانے کی کوشش کی جائے گی تو یہ الیکٹرونک راڈار گاڑی کو مکمل جام کر دیں گے۔ الیکٹرونک راڈار سسٹم سے گاڑی کی موجودگی کے بارے میں لمحہ بہ لمحہ اپ ڈیٹس ملتی رہیں گی۔

موضوعات:گاڑی مالکان گاڑیاں چوری