روانڈا (آئی این پی)چین افریقی ممالک کی ترقی اور تعمیر میں بھرپور کردار ادا کررہا ہے ، وہ اس کے توانائی اور بنیادی ڈھانچے کی تعمیر کیلئے ہر قسم کا تعاون کررہا ہے ، افریقی ممالک بھی چین کے ساتھ مل کر فعال کردار ادا کررہے ہیں ، وہ اپنے ترقی کے اگلے مرحلے میں بنیادی ڈھانچے کی تعمیر اور صاف انرجی کی ترقی کیلئے کوششیں کررہے ہیں ۔ یہ بات افریقن یونین کی کمشنر برائے توانائی الہام محمود ابراہیم نے یہاں افریقی یونین کی 27ویں کانفرنس سے خطاب کرتے ہوئے کہی ۔ انہوں نے کہا کہ افریقہ اس وقت تک خوشحالی سے ہمکنار نہیں ہو سکتا جب تک اس کا انفراسٹرکچر ترقی یافتہ نہ ہو اور وہ صاف انرجی کے مرحلے میں داخل نہ ہو ، ہم چینی حکومت کے ساتھ شراکت داری کررہے ہیں جس کی وجہ سے چینی سرمایہ کار اس سلسلے میں ہمارے ساتھ تعاون کررہے ہیں ۔ یاد رہے کہ عالمی بینک کے مطابق افریقی ممالک کی صرف 38فیصد آبادی کو بجلی کی سہولت حاصل ہے جبکہ صرف دس فیصد کی انٹر نیٹ تک رسائی ہے ، چینی حکومت نے گذشتہ سال چین افریقہ تعاون کے تحت آئندہ تین برسوں کے دوران دس بڑ ے منصوبے مکمل کرنے کا اعلان کیا تھا ، اس سلسلے میں چین نے ساٹھ ارب امریکی ڈالر کی پیشکش کی تھی ۔