کراچی (نیوز ڈیسک )ایران نے 4 لاکھ بیرل خام تیل بیرون ملک بھیجنے کیلئے آئل ٹینکرز بھرنا شروع کردیے۔ تفصیلات کے مطابق ایران نے 4لاکھ بیرل خام تیل بیرون ملک بھیجنے کیلئے آئل ٹینکرز میں بھرنا شروع کر دیے ہیں۔ ایران آئندہ 24 گھنٹے کے دوران 4 لاکھ بیرل خام تیل یورپ کو برآمد کرے گا۔ایران کے خلاف پابندیاں اٹھنے کے بعد اس کی خام تیل کی برآمد میں یکدم اضافہ ہو گیا ہے اور4لاکھ بیر ل خام تیل سے بھرے آئل ٹینکرز پیر کو یورپ روانہ کرے گا جس میں سے 2لاکھ بیرل خام تیل کی خریدار فرانسیسی کمپنی ٹوٹل ہے جبکہ روس اور اسپین کی کمپنیوں نے بھی ایک ایک لاکھ بیرل تیل خریدا ہے۔تیل کی نئی کھیپ یورپی منڈی میں پہنچنے سے عالمی سطح پر تیل کی قیمتوں میں گراوٹ کا خدشہ ہے۔ ایران کی قومی آئل کمپنی کے ڈائریکٹر رکن الدین جاویدی کا کہنا ہے کہ تیل 3ٹینکروں میں بھیجا جا رہا ہے۔علاوہ ازیں ایران کے نائب صدر اسحاق جہانگیری نے کہا ہے کہ ایران 1.3 ملین بیرل خام تیل یومیہ برآمد کررہا ہے اور نئے ایرانی سال کے آغاز پر برآمد کی شرح 1.5 بیرل یومیہ ہو جائے گی۔ ایک انٹرویو میں ان کا کہنا تھا کہ بین الاقوامی پابندیوں کے خاتمے کے بعد ایران آئل مارکیٹ میں بتدریج جگہ بنا رہا ہے ،اس وقت ایران 1.3 ملین بیرل خام تیل یومیہ برآمد کررہا ہے۔20 مارچ سے نئے ایرانی سال کا آغاز ہو جائے گا اور نئے مالی سال کے آغاز پر تیل برآمد کرنے کی شرح 1.5 ملین بیرل یومیہ ہو جائے گی۔2011ء میں اقتصادی پابندیوں سے قبل ایران کی تیل کی یومیہ پیداوار 3 ملین بیرل تھی۔