جدہ(نیوز ڈیسک)سعودی عرب کے وزیر صحت اور ارامکو کے چیئرمین بورڈ ا?ف ڈائریکٹرز خالدالفالح نے کہا ہے کہ تیل کے محفوظ ذخائر سعودی مملکت کی ذاتی ملکیت ہیں، ان کو ارامکو کے وسائل کی ویلیو قرار دے کر فروخت نہیں کیا جائے گا۔سعودی وزیرصحت نے ان خیالات کا اظہار ڈیووس میں ہونے والے عالمی اقتصادی فورم کے موقع پر ایک عربی ٹی وی ’العربیہ‘ سے گفتگو کے دوران کہی۔الفالح نے کہا کہ ارامکو کمپنی کے پاس موجود ذخائر کا تعین تیل کی نقد قیمت کے حساب سے کیا جاتا ہے۔ انہوں نے مزید کہا کہ ارامکو سمیت کئی دوسری سرکاری فرموں اور صحت کے شعبے کے تحت کام کرنے والے اداروں کے بنیادی ڈھانچے میں تبدیلی کی تجویز زیرغور ہے، ہم سعودی عرب کو مضبوط معاشی ملک اور عالمی سطح پر اس کے موثر اقتصادی کردار کے لیے کمپنی کو ایک نئے دور میں داخل کرنے کی تجاویز پرغور کررہے ہیں۔ سعودی فیصلہ سازوں کو اس بات پر فخر ہے کہ ارامکو کے پاس بڑے اقتصادی سیکٹر بنانے کے نہ صرف وسائل موجود ہیں بلکہ کمپنی اپنے منصوبوں کو پایہ تکمیل تک پہنچانے کی بھی اہلیت رکھتی ہے۔الفالح کا کہنا تھا کہ ارامکو کا پہلا میدان مملکت میں تیل، گیس اور پیٹرو کیمیکل کے شعبے میں موجود وسائل کو منظم کرنا ہے۔ محفوظ وسائل صرف مملکت کی ملکیت ہیں۔ کمپنی کی صلاحیت محفوظ ذخائر کو نقد قیمت میں تبدیل کرنا ہے۔ محفوظ ذخائر فروخت نہیں کیے جائیں گے مگرکمپنی کی ذخائر کو قیمت میں تبدیل کرنے کی صلاحیت برقرار رہے گی جسے فروخت کیا جائے گا۔