بیجنگ(نیوز ڈیسک)چین نے اپنی معیشت کو استحکام دینے کے لیے شرح سود میں مزید کمی کر دی ہے۔پیپلز بینک آف چائنا نے بازارِ حصص میں دو دن سے جاری مندی کے بعد اپنے لینڈنگ ریٹ کو 0.25 فیصد سے 4.6 فیصد پوائنٹس تک کم کر دیا ہے۔پیپلز بینک آف چائنا نے گذشتہ نومبر سے شرح سود میں پانچویں بار کمی کی ہے اور حالیہ کمی کا اطلاق بدھ سے ہو گا۔چین کی جانب سے شرح سود میں کمی کے اعلان کے بعد عالمی بازار حصص میں آنے والی مندی کے بعد اضافہ دیکھا جا رہا ہے اور ڈو جونز کے انڈیکس میں 1.7 فیصد اضافہ ہوا۔اسی طرح منگل کو کاروبار کے اختتام پر لندن کے فٹسی 100 انڈکس میں تین فیصد، جرمنی کے ڈیکس میں پانچ فیصد اور پیرس کے انڈیکس میں 4.1 فیصد اضافہ ہوا۔یورپ کے دیگر بازارِ حصص جن میں لسبن، میڈریڈ، ماسکو اور میلان شامل ہیں میں بھی کاروبار کے اختتام پر تیزی آئی۔پیپلز بینک آف چائنا کا کہنا ہے کہ شرح سود میں کمی کا مقصد ’فنانسنگ کی سماجی قیمت کو فروغ اور حقیقی معیشت کی پائیداری اور صحت مند پیش رفت کی حمایت کرنا ہے۔‘ادھر معاشیات کے ماہرین نے پیپلز بینک آف چائنا کی جانب سے کیے جانے والے اس اقدام کو سراہا ہے۔جے پی مورگن کی جانب سے ایک تحقیقی نوٹ میں کہا گیا ہے کہ چین کے فیصلے کو متعدد سرمایہ کاروں کی جانب سے واجب تصور کیا جائے گا۔سنگا پور کے ایک سرمایہ کار جِم راجرز کا کہنا ہے کہ ان کے خیال میں چین کے بازار میں آنے والا خوف بہت جلد ختم ہو جائے گی۔واضح رہے کہ چین کے بازارِ حصص شنگھائی کمپوزٹ میں منگل کو مزید 3.2 فی صد کی کمی واقع ہوئی جبکہ پیر کو یہ بازار ڈرامائی طور پر ساڑھے آٹھ فی صد گر گیا تھا۔گذشتہ روز پیر کو یورپ اور امریکہ کے سٹاکس میں بھی شدید مندی دیکھی گئی۔عالمی طور پر اس مندی کی وجہ چینی معیشت کی ترقی کی رفتار میں سست روی کا خوف تھا کہ اس کی وجہ سے عالمی معیشت میں گراوٹ آ جائے گی۔صارفین اس بات سے خوفزدہ ہیں کہ جو کمپنیاں چین پر زیادہ انحصار کرتی ہیں وہ اس رجحان سے متاثر ہوں گی کیونکہ چین دنیا کی دوسری بڑی معیشت ہے اور سامان تجارت اور تجارتی خدمات برآمد کرنے میں بھی دوسرے نمبر پر ہے۔چین کے مرکزی بینک نے ملک کی کرنسی ’یوان‘ کی قدر میں دو ہفتے قبل کمی کی تھی جس سے ان خدشات کو تقویت ملی کہ ملکی معیشت میں آنے والی سست روی اندازے سے کہیں زیادہ ہے۔