اسلام آباد(نیوزڈیسک)ایف بی آر کے ترجمان و سینئر ممبر ان لینڈ ریونیو (پالیسی) شاہد حسین اسد نے کہا ہے کہ معروضی حالات میں تاجروں کی ایکم اگست کو مکمل شٹرڈائون ہڑتال نہیں ہوگی.معروف صحافی حنیف خالد کے مطابق شاہد حسین اسد نے کہا ہے کہ بزنس کمیونٹی کو اس امر کا احساس ہے کہ پاکستان میں سالانہ آمدنی گوشوارے اور اس پر ٹیکس ادا کرنے والوں کی تعداد کل آبادی کے نصف فیصد سے بھی کم ہے جبکہ بھارت میں یہ تعداد وہاں کی آبادی کے ساڑھے چار فیصد سے بھی زائد ہے پاکستان کو باوقار قوم بنانے کیلئے پاکستان کے صاحب حقیقت افراد کو بھارتی تاجروں کی طرح اپنے حصے کا ٹیکس قومی خزانے میں جمع کرانا ہوگا۔ انہوں نے رات گئے جنگ کے سوال پر کہا کہ یکم اگست 2015ء کو تاجروں کی ملک گیر ہڑتال نہیں ہوسکے گی کیونکہ وفاقی وزیر خزانہ ریونیو اقتصادی امور شماریات و نجکاری سینیٹر محمد اسحاق ڈار کی مشاورت سے وزیراعظم کے خصوصی معاون برائے ریونیو ہارون اختر خان چیئرمین ایف بی آر طارق باجوہ سینئر ممبر ان لینڈ ریونیو (پالیسی) شاہدحسین اسد دوسرے ممبروں نے ایف بی سی سی آئی اور قومی اسمبلی کے متعلقہ ارکان کی مشاورت سے مذاکرات کا سلسلہ جاری رکھنے کا فیصلہ کیا ہے، مذاکرات کمیونیکیشن کمیٹی، انکم ٹیکس کمیٹی، سیلز ٹیکس کمیٹی کی رپورٹیں آنے کے بعد ایف بی آر کھلے دل سے مذاکرات کرے گا جو 13 اگست 2015ء تک حکومت کو مل جائیں گی اس لئے آئندہ مذاکرات اگست کے تیسرے ہفتے میں ہوں گے