کراچی(نیوزڈیسک)پاکستان پیپلز پارٹی پارلیمنٹیرینز کی نائب صدر سینیٹر شیر ی رحمن نے اپنے ایک بیان میں کہا ہے کہ وفاقی حکومت کی ایمائپر سندھ سدرن گیس کمپنی (ایس ایس جی سی) نے یکطرفہ طور پر پاکستان سٹیل ملز کی گیس کی سپلائی منقطع کر دی ہے ۔ انہوں نے کہا کہ یہ ایک ایسی حکومت اور ادارے کا کام ہے جس کو مزدوروں کی فلاح و بہبود کا کوئی خیال نہیں۔ انہوں نے کہا کہ اس ادارے سے ہزاروں لاکھوں لوگوں کا روزگار منسلک ہے اور اب اس مسئلے کو مشترکہ مفادات کونسل میں اٹھایا جائے گا۔ انہوں نے کہا کہ ایس ایس جی سی انتظامیہ نے کسی بھی اسٹیک ہولڈر سے مشورہ نہیں کیا اور یہ یکطرفہ اقدام اٹھا لیا۔ ایسا لگتا ہے کہ وفاقی حکومت نے سٹیل ملز کو کام سے روک کر اسے اونے پونے بیچنے کی راہ ہموار کرنے کی کوشش کی ہے ۔ انہوں نے کہا کہ اسٹیل ملز ایک ایسا ادارہ ہے جو ایک دفعہ بند ہوجائے تو پھر اسے دوبارہ شروع کرنے کے لئے دو سے چار سال لگ سکتے ہیں۔ انہوں نے کہا کہ پاکستان اسٹیل ملز کی بنیاد قائد عوام ذوالفقار علی بھٹو نے رکھی تھی اور یہ ان کا وژن تھا جس سے پاکستان کی معیشت کو فائدہ ہوا۔ انہوں نے کہا کہ اس وقت سٹیل ملز کے 17ہزار ملازمین کے روزگار کو دا پر لگا دیا گیا ہے –