اسلام آباد (نیوز ڈیسک) گورنر سٹیٹ بینک اشرف وتھرا نے اوپن مارکیٹ میں ڈالر کو لگام دینے کیلئے ایکسچینج کمپنیوں کے عہدیداروں کو فوری اقدامات کرنے کی ہدایت کردی ہے۔ گورنر سٹیٹ بینک اشرف وتھرا نے فاریکس کمپنیوں کے عہدیداروں سے ملاقات کے دوران بیرونی کرنسی کی مصنوعی قلت کا نوٹس لیتے ہوئے عدم اطمینان کا اظہار کیا۔ انہوں نے تاکید کی کہ ایکسچینج کمپنیاں غیر ملکی کرنسی کی قلت کا تاثر ختم کرنے کےلئے فوری اقدامات لیں۔ سٹیٹ بینک اس حوالے ہر ممکن رہنمائی فراہم کرےگا۔ انٹر بینک اور اوپن مارکیٹ میں ڈالر کی قیمت کا فرق 1 روپے 60 پیسے تک پہنچ چکا ہے، ڈیلرز کے مطابق اوپن مارکیٹ میں ڈالر 103 روپے 40 پیسے جبکہ انٹر بینک میں 101 روپے 80 پیسے میں بک رہا ہے۔ دوسری جانب فاریکس ایسوسی ایشن کے چیئرمین ملک بوستان نے بتایا کہ عید کی تعطیلات کے باعث عرب ممالک میں کاروبار ایک ہفتے بند رہنے سے ڈالر کی رسد متاثر ہوئی ہے ، گورنر سٹیٹ بینک کی ہدایت پر کمرشل بینک ایکسچینج کمپنیوں کو ڈالر کی فراہمی بھی بہتر کریں گے ، انہوں نے مزید کہا کہ سٹیٹ بینک ڈالر کی سمگلنگ کو روکنے کےلئے بھی ضروری اقدامات کرےگا۔