اسلام آباد(نیوزڈیسک) پاک چین اقتصادی راہداری منصوبے کیلئے پی ایس ڈی پی میں رکھے گئے 58 ارب 10 کروڑ روپے (آج) یکم جولائی سے بتدریج جاری کرنے کا عمل شروع ہوجائےگا۔پی ایس ڈی پی16۔ 2015ءآج سے نافذ العمل ہوگا اور اس کے تحت پاک چین اقتصادی راہداری منصوبے کےلئے پہلی مرتبہ رقم مختص کی گئی ہے ۔ راہداری کے شمالی روٹ میں شامل تھاکوٹ سے حویلیاں 120لومیٹر سڑک کی اپ گریڈیشن اور ازسرنو تعمیر کے فیز ون کےلئے سب سے زیادہ ساڑھے بیس ارب روپے رکھے گئے ہیں ۔ اس کی منظوری ایکنک نے 2014ءمیں دی تھی اور اس سیکشن کی کل لاگت 95 ارب 41 کروڑ روپے ہوگی۔ اس سیکشن کی حصول اراضی کےلئے پانچ ارب روپے رکھے گئے ہیں جبکہ تخمینہ لاگت آٹھ ارب 40 کروڑ روپے ہے ۔ سی پی ای سی کے تحت ایم ون پر براہمہ باہتر انٹرچینج سے براستہ فتح جنگ ، پنڈی گھیب ، کالا باغ ، ڈیرہ اسماعیل خان تک ایک نئی چار رویہ ایکسپریس وے تعمیر کی جائے گی جس کےلئے دس ارب روپے رکھے گئے ہیں جن میں پانچ ارب روپے کی اراضی خریدی جائے گی ۔ اس سڑک کی مجموعی لاگت 68 ارب روپے ہوگی اور فتح جنگ سے ترنول تک دو رویہ سڑک تعمیر کی جائےگی جس کا مقصد وفاقی دارالحکومت اسلام آباد کو ڈیرہ اسماعیل خان کوریڈور سے براہ راست منسلک کرنا ہے پی ایس ڈی پی میں سے اسلام آباد ، میانوالی ، ڈی آئی خان روٹ کا نام دیا ہے ۔ناردرن روٹ کے تحت برہان تا حویلیاں 59 کلومیٹر ایکسپریس وے کی تعمیر کےلئے دو ارب 30 کروڑ روپے رکھے گئے ہیں جبکہ سڑک کی مجموعی لاگت ساڑھے 39 ارب ہے اور اب تک اس پر دو ارب 82 کروڑ روپے خرچ ہوچکے ہیں جبکہ مزید 34 ارب روپے درکار ہیں ۔ سی پی ای سی کے مغربی روٹ کے تحت ڈیرہ اسماعیل خان سے گوادر تک مختلف علاقوں میں اراضی کی خریداری کےلئے دس ارب روپے رکھے گئے ہیں جبکہ اس مقصد کےلئے 60 ارب روپے درکار ہیں ۔ ڈیرہ اسماعیل خان سے مغل کوٹ تک 50 کلومیٹر سیکشن کی بحالی کےلئے دو ارب روپے رکھے گئے ہیں جبکہ درکار رقم چار ارب روپے ہے ۔ مغل کوٹ سے ژوب تک 81 کلومیٹر سیکشن کی بہتری کےلئے تین ارب روپے رکھے گئے ہیں جبکہ درکار رقم نو ارب روپے ہے