کراچی(نیوزڈیسک) باکمال لوگوں نے ایک اورلاجواب چاندچڑھادیا۔قومی ایئرلائن سے تعلق رکھنے والے باکمال لوگ آئے دن کوئی نا کوئی ایسا کارنامہ سر انجام دیتے رہتے ہیں جس سے وطن عزیز کی عزت میں اضافے کے بجائے اس کی ناموس خاک میں ملتی ہے ایسا ہی واقعہ اس وقت پیش آیا جب عملے کے متعلقہ حکام لاکھوں روپے تنخواہ لینے کے باوجود سعودی عرب میں اپنے عملے کی آمدورفت کی تجدید کرانا ہی بھول گئے اور نتیجے میں قومی خزانے کو لاکھوں روپے نقصان اٹھانا پڑ گیا۔ گزشتہ رات قومی ایئر لائن کی پرواز پی کے 759 لاہورسے جدہ پہنچی تو طیارے کے عملے کو پتہ چلا کہ پی آئی اے کی انتظامیہ نے ان کی آمد ورفت کی اجازت کی تجدید ہی نہیں کرائی، سعودی حکام نے قانون کے مطابق عملے کو روک لیا جس پر قومی ائیرلائن کی انتظامیہ نے نا صرف سعودی حکام سے تحریری طور پر معذرت کی بلکہ فی کس 3 ہزار ریال جرمانہ بھی ادا کیا۔ جس کے بعد ہی باکمال لوگوں کو ہوٹل جانے کی اجازت ملی۔دوسری جانب ترجمان پی آئی اے کا کہنا ہے کہ واقعہ ضرور پیش آیا تھا تاہم معاملات خوش اسلوبی سے حل کرلیے گئے ہیں، اس واقعے کا عمرہ آپریشن پراثرنہیں پڑے گا ان کا کہنا تھا کہ ایسے آپریشنل معاملات کے ذمہ دار جی ایم سینٹرل کنٹرول کی ہوتی ہے جس کی سیٹ کئی ہفتوں سے خالی ہے۔