فیصل آباد(نیوزڈیسک )وزیر اعلی پنجاب محمد شہباز شریف کی خصوصی ہدایت پر محکمہ زراعت کو فیصل آباد ڈویژن سمیت صوبہ بھر کے تمام سستے رمضان بازاروں میں سبزیوں کی ضرورت کے مطابق فراہمی اورمناسب قیمتوں پر فروخت یقینی بنانے کا ٹاسک سونپ دیاگیاہے جس کے مطابق محکمہ زراعت کے حکام فیصل آبادکے مختلف مقامات پر لگائے جانیوالے 18روزانہ سستے رمضان بازاروں کے ساتھ ساتھ ڈویژن کے چاروں اضلاع فیصل آباد، جھنگ، ٹوبہ ٹیک سنگھ ،چنیوٹ سمیت صوبہ بھرمیں پیاز ، لہسن ،آلو، بھنڈی توری ، گھیا کدو، کریلے،ٹماٹر، سبزمرچ ،دھنیا، گھیاتوری، بینگن، پالک، شملہ مرچ، پودینہ وغیرہ کی مطلوبہ ضرورت کے مطابق صارفین کو فراہمی یقینی بنانے کیلئے اقدامات کریں گے اور اس ضمن میں مارکیٹ کمیٹیوں کے حکام کے ساتھ مل کر عوام کو مناسب نرخوں پر سبزیوں کی تسلسل کے ساتھ ترسیل و دستیابی کو یقینی بنایاجائیگا ۔ محکمہ زراعت فیصل آباد ڈویژن کے ترجمان نے بتایاکہ حکومتی ہدایات کی روشنی میں سستے رمضان بازاروں میں دالوں اور پھلوں کے بھی خصوصی سٹال لگوائے گئے ہیں تاکہ روزہ داروں کو تمام اشیائے ضروریہ ایک ہی مقام پر مناسب نرخوں پر دستیاب ہو سکیں۔ انہوں نے بتایاکہ اس ضمن میں روزانہ کی بنیاد پررپورٹ متعلقہ ضلع کے ڈی سی او سمیت سیکرٹری زراعت پنجاب کو ارسال کی جائے گی ۔ انہوں نے بتایاکہ رمضان المبارک کے دوران کسی بھی جگہ پر کسی بھی اشیائے ضروریہ کی مصنوعی قلت پیدا نہیں ہونے دی جائے گی اور اگر ضرورت محسوس ہوئی تو انتظامی حکام وپولیس افسران کے ساتھ مل کر کولڈ سٹوریجز اور دیگر جنرل سٹورآئٹمز کے گوداموں پر چھاپوں سے بھی گریز نہیں کیاجائیگا۔