ممبئی (آئی این پی) معروف بھارتی کامیڈین کپل شرما نے انکشاف کیا ہے کہ ڈپریشن کے باعث وہ کئی بار خودکشی کے بارے میں سوچ چکے ہیں۔کپل شرما نے حال ہی میں اپنی آنے والی فلم ‘زوئی گیٹو’ کے ایک تشہیری ایونٹ میں اس بات کا انکشاف کیا۔
ایونٹ میں کپل شرما نے ڈپریشن سے متعلق بات کی اور ان لوگوں کو پیغام دیا جو اس کا شکار ہیں۔ کپل نے کہا کہ ایک عوامی شخصیت کے طور پر کروڑوں لوگ آپ کو جانتے ہیں، آپ ان کو تفریح فراہم کرتے ہیں لیکن جب آپ گھر آتے ہیں تو آپ اکیلے ہوتے ہیں۔ کامیڈین نے کہا آپ اس حالت میں بھی نہیں ہوتے کہ عام زندگی گزار سکیں جہاں آپ باہر گھومنے جائیں، ساحل سمندر پر بیٹھ کر سمندر کو دیکھ سکیں، آپ دو کمروں کے فلیٹ میں رہتے ہیں اور جب شام تک باہر اندھیرا چھا جاتا ہے تو میں بیان نہیں کر سکتا کہ اس صورتحال میں کتنا برا احساس ہوتا ہے۔بات جاری رکھتے ہوئے کپل نے کہا اس صورتحال میں، میں نے خودکشی کرنے کا سوچا تھا۔کامیڈین نے مزید کہا کہ مجھے نہیں لگتا کہ یہ پہلا موقع تھا جب میں اس مرحلے سے گزرا ہوں۔
