لاہور ( آن لائن) سابق مشیر پنجاب حکومت عبدالحئی دستی اینٹی کرپشن ہیڈکوارٹر آفس لاہورکے طلب کرنے کے باوجود گزشتہ روز تفتیشی افسر کے سامنے پیش نہ ہوئے ۔عبدالحئی دستی کے گھر سے چند روز قبل محکمہ اینٹی کرپشن پنجاب نے چھاپہ مار کر 15کروڑ روپے سے زائد برآمد کئے تھے۔
عبدالحئی دستی نے مبینہ طور پر رشوت اور کک بیکس سے حاصل کی گئی یہ رقم گھر میں چھپا رکھی تھی۔محکمہ اینٹی کرپشن نے عبدالحئی دستی کو طلبی کا دوبارہ نوٹس جاری کرنے کا فیصلہ کر لیا۔ دریں اثنا پی ٹی آئی رہنما عثمان ڈار نے آج تفتیشی افسرکو اپنا بیان ریکارڈ کرایا۔عثمان ڈار کو سیالکوٹ میں پبلک ہیلتھ اور لوکل گورنمنٹ میں جاری سکیموں کے ٹھیکوں میں رشوت لینے کے الزام میں درج مقدمہ میں طلب کیا گیا۔عثمان ڈار پر من پسند افراد کو ٹھیکے دیکر نوازنے کاالزام ہے۔پی ٹی آئی رہنما عثمان ڈار نے جواب جمع کرانے کے لئے آج 8 مارچ تک کی مہلت مانگی تھی ۔عثمان ڈار، عمر ڈار، عامر ڈار نے سارے منصوبے بغیر نقشہ منظوری کے ٹھیکہ پر دئیے ۔اس کیس میںپبلک ہیلتھ انجینئرنگ کے ایس ڈی او جہانگیر بٹ کو پہلے ہی گرفتار کیا جا چکا ہے ۔جہانگیر بٹ کے بیان کے مطابق ان سے پانچ لاکھ روپے لے کر ان کی ٹرانسفر رکوائی گئی اورایک ٹھیکیدار نے عامر ڈار کی بیٹی کی شادی کا سارا خرچہ اٹھایا۔ترجمان محکہ اینٹی کرپشن پنجاب نے بتایا کہ ایس ڈی او پبلک ہیلتھ انجینئرنگ جہانگیر بٹ کے خلاف پہلے ہی مقدمہ درج ہے اور اسی مقدمہ میں تحریک انصاف کے رہنما عثمان ڈار اور انکے بھائیوں کی انکوائری کی جا رہی ہے۔ترجمان کے مطابق اینٹی کرپشن نے عثمان ڈار ، عمر ڈار اور عامر ڈار تینوں بھائیوں کے اثاث جات کی تفصیلات اگلی پیشی پر طلب کر لی ہیں
