اسلام آباد (مانیٹرنگ ڈیسک)کاروں کی ایل سی نہ کھولنے پر جرمنی ناراض ہو گیا، سنگین معاشی نتائج کی دھمکی دے ڈالی، زرمبادلہ کے ذخائر میں کمی ملکی برآمدات خطرہ بن گئی ہے۔جرمنی کے سفیر الفریڈ گراناس نے وفاقی وزیر اقتصادی امور کو وارننگ کا خط جاری کیا ہے جس میں انہوں نے جرمن الیکٹرک کاروں کے لئے ایل سی نہ کھولنے پر سنگین معاشی نتائج کی دھمکی دی ہے۔خط میں لکھا گیا کہ سٹیٹ بینک الیکٹرک کاروں کی امپورٹ کیلئے ایل سی کھولنے کی اجازت نہیں دے رہا۔ جرمن کاروں کیلئے ایل سی فوری نہ کھولی گئی توجی ایس پی پلس کے ثمرات کم ہوجائیں گے۔جرمن الیکٹرک کاروں کی ایل سی نہ کھول کر باہمی تجارت کے منافی اقدام کیا گیاہے۔ جرمنی یورپی یونین میں پاکستانی مصنوعات کوسب سے بڑا خریدار ہے، خط میں مزید کہا گیا کہ جرمن الیکٹرک کاروں کی ایل سی نہ کھلی تو پاکستان کو ناقابل تلافی نقصان اٹھانا پڑے گا۔