لاہور ( این این آئی) سربراہ عوامی مسلم لیگ اور سابق وزیر داخلہ شیخ رشید نے کہا ہے کہ اس پر سب ججز متفق ہیں کہ 90دن میں الیکشن ہوں گے اور الیکشن کمیشن اس کو یقینی بنائے گا۔

نگران حکومت 90دن کے لئے ہے۔ سماجی رابطے کی ویب سائٹ ٹوئٹر پر اپنے پیغام میں سابق وفاقی وزیر شیخ رشید نے کہا کہ مہنگائی 50فیصد بڑھ گئی اور ڈالر بھی 275روپے سے اوپر چلا گیا، آسیب زدہ سائے ملک میں چھا جانے کا خطرہ ہے، پاکستان ڈیموکریٹک موومنٹ (پی ڈی ایم)میں پھوٹ پڑ گئی ہے، کل جمعہ کے روز 3 بجے لال حویلی میں پریس کانفرنس کروں گا۔انہوں نے کہا کہ فضل الرحمان کا فرنٹ مین خیبر پختونخوا کا گورنر صوبے کی سیاست کے لئے صدر کے پاس کیا پیغام لایا وہ جلد ٹوئٹ کروں گا، اہم خبر کے لئے عوام میرے ٹوئٹر اکائونٹ کو 30 اپریل تک فالو کریں۔شیخ رشید کا مزید کہنا تھا کہ یہ 3ججوں کا نہیں بلکہ ساری سپریم کورٹ اور پاکستان کی عزت، وقار کا مسئلہ ہے جسے سارے جمہوریت دشمن ڈاکو دائو پر لگانا چاہتے ہیں، جن 2 قابل احترام ججوں نے کیس سنا ہی نہیں ان کو فیصلے میں کیسے دھکیلا جا سکتا ہے۔