اسلام آباد (این این آئی)ملکی کمزور معاشی صورتحال کے پیش نظر دفاعی اداروں کے پٹرولیم، یوٹیلٹی بلز اور راشن کے اخراجات محدود کر نے کا فیصلہ کرلیا گیا۔ نجی ٹی وی کے مطابق پٹرولیم مصنوعات کی مد میں دفاعی ادارے کے اخراجات میں 35 فیصد، یوٹیلٹی بلز کے اخراجات میں 35 سے 40 فیصد تک کمی کا فیصلہ کیا گیا ہے،راشن اور کھانے پینے کی اشیاء کے اخراجات میں کمی سے 20 ارب روپے سے زائد بچت ہوگی۔ذرائع کے مطابق عسکری قیادت کی مشاورت کے بعد کئے گئے فیصلوں کے تحت فوج میں ہر قسم کی نان آپریشنل خریداری پر بھی پابندی عائد کر دی گئی، دفاعی اور حربی سامان کی امپورٹ لوکل کرنسی یا کرنسی سواپ کے تحت ہوگی۔ذرائع کے مطابق ٹریننگ کیلئے جدید ٹیکنالوجی اور آن لائن میٹنگز بڑھانے کا فیصلہ کیا گیا، ملکی معیشت میں بہتری کیلئے ہر قسم کے اخراجات میں کمی فوری نافذ العمل ہوگئی۔

موضوعات:اخراجات محدود