جمیکا /جوہانسبرگ(این این آئی)کرکٹ گرائونڈ میں 20 سال قبل ہونے والی چیز کو بالکل اسی طرح دوبارہ دیکھ کر شائقین حیران رہ گئے۔غیرملکی میڈیا کے مطابق 2003 میں جنوبی افریقا اور ویسٹ انڈیز کے درمیان ٹیسٹ میچ کھیلا گیا تھا جس کی دونوں اننگز میں جنوبی افریقی فاسٹ بولر مکھایا این ٹینی نے
ویسٹ انڈیز کے بیٹر چندرپال کو آئوٹ کیا تھا۔اب 20 سال بعد 21 سے 23 فروری کے درمیان جنوبی افریقا اور ویسٹ انڈیز کے درمیان ٹور میچ کھیلا گیا۔اس میچ میں 20 سال پہلے کھیلے گئے کھلاڑیوں کے بیٹوں نے اپنی اپنی ٹیم کی نمائندگی کی اور حیرت انگیز طور پر اس مرتبہ جنوبی افریقی بولر کے بیٹے نے ویسٹ انڈیز کے کھلاڑی کے بیٹے کو دونوں مرتبہ آئوٹ کیا۔اس کے علاوہ 2003 اور 2023 میں ہونے والے ان دونوں میچز میں اور بھی چیزیں مشترکہ ہیں۔2003 کے ٹیسٹ میچ میں ویسٹ انڈیز کے چندرپال بائیں ہاتھ سے بیٹنگ کرتے تھے جب کہ ان کا بیٹا بھی بائیں ہاتھ سے بیٹنگ کرتا ہے اور دونوں باپ اور بیٹا میچ کی دونوں اننگز میں کیچ آئوٹ ہوئے۔اسی طرح جنوبی افریقا کے سابق فاسٹ بولر مکھایا این ٹینی کا بیٹا بھی فاسٹ بولر ہے۔واضح رہے کہ ویسٹ انڈیز اور جنوبی افریقا کے درمیان 2 ٹیسٹ میچز کی سیریز کا پہلا میچ 28 فروری سے 4 مارچ جبکہ دوسرا میچ 8 سے 12 مارچ تک کھیلا جائے گا۔
