کراچی ( این این آئی) پاکستان سپر لیگ کی ٹیم کراچی کنگز کی مسلسل شکست پر سابق کرکٹر وسیم اکرم اپنے غصے پر قابو نہ رکھ سکے۔
پی ایس ایل کے 11ویں میچ میں ملتان سلطانز کے خلاف سنسنی خیز مقابلے کے بعد کراچی کنگز کی 3رنز سے شکست پر وسیم اکرم نے اسٹیڈیم میں ہی اپنا غصہ باہر نکال دیا۔اس حوالے سے سوشل میڈیا پر سامنے آنے والی ویڈیو میں دیکھا جاسکتا ہے کہ وسیم اکر م نے پہلے اپنا سر پکڑا اور پھر سامنے موجود کرسی پر زوردار لات بھی ماری۔گزشتہ میچز کے دوران بھی وسیم اکرم کے چہرے کے تاثرات تبدیل ہوتے دیکھے گئے تھے۔پی ایس ایل 8کے دوران کراچی کنگز اب تک 5 میچز کھیل چکی ہے جن میں سے اسے 4میں شکست ہوئی ہے۔دوسری جانب وسیم اکرم کے تاثرات پر مداح حیرانی کا اظہار بھی کر رہے ہیں جبکہ سوشل میڈیا پر اس حوالے سے مختلف میمز بھی شیئر کی جارہی ہیں۔سابق کپتان کی اہلیہ شنیرا اکرم بھی اپنے شوہر کا غصہ دیکھ کر حیران ہو گئیں اور ویڈیو پر ردعمل دیا۔شنیرا اکرم نے وسیم اکرم کے غصے والی ویڈیو پر حیرانی والا ایموجی شیئر کیا ہے۔
