لاہور(نیوزڈیسک) الیکشن ٹربیونل کے سابق جج جسٹس (ر) کاظم علی ملک نے وفاقی وزیر اطلاعات و نشریات سینیٹر پرویز رشید کو خط ارسال کیا ہے جس میں کہا گیا ہے کہ آپ کی زہر آلود دھمکی سے خوفزدہ نہیں ہوں ۔ طبعی عمر پوری کر چکا ہوں اور 67سال کی عمر میں خودنمائی کا ہرگز شوق نہیں ۔ کاظم علی ملک کی جانب سے لکھے گئے خط میں مزید کہا گیا ہے کہ آپ جیسے اقتدار میں بیٹھے ہوئے لوگوں کو خود نمائی کا شوق ہے اور وہ خود کو لا فانی سمجھتے ہیں ۔ یاد رکھیںکہ آپ سے زیادہ طاقت کے حامل لوگوں کو اللہ تعالیٰ نے قبروں میں قید کر دیا اور وہ اتنے بے بس اور لا چار ہیں کہ اپنے جسموں پر رینگتے ہوئے کیڑوں کو بھی نہیں روک سکتے۔ میں ہرگز کسی سے تعصب نہیں رکھتا ۔ میں نے خواجہ آصف کے حق میں فیصلہ دیا ،حامد خان کے خلاف الیکشن کمیشن میں ریفرنس بھیجا کیا یہ تعصب پر مبنی فیصلے تھے ۔میں نے ساری زندگی عدلیہ میں گزاری ہے میںعدالتی نظم و نسق کو جانتا ہوں ۔ کسی بھی جج کے فیصلے پر تنقید کی جا سکتی ہے لیکن جج اس پر نہیں بولتا کیوںکہ اس کے فیصلے بولتے ہیں لیکن جب جج کے فیصلے کی بجائے اس کی ذات کو نشانہ بنا یا جائے تو جج پھر بولتا ہے۔