پشاور (نیوز ڈیسک) پشاور کے نجی ہسپتال میں پلاسٹک سرجن نے نو سالہ بچے کے ٹریفک حادثے میں کٹے ہوئے بازو کو دوبارہ جوڑ دیا ، خیبر پختونخوا میں یہ اپنی نوعیت کی پہلی سرجری کی گئی ہے۔پشاور کے نواحی علاقے چمکنی کے رہائشی نیاز احمد کا نو سالہ بیٹا عبد الواسع سڑک پار کرتے ہوئے دو گاڑیوں کے درمیان آ گیا۔ دونوں جانب سے زور دار چوٹ نے تیسری جماعت کے طالبعلم عبد الواسع کے دائیں بازو کو کہنی سے اوپر مکمل طور پر کچل کر رکھ دیا۔بچے کے والد اور محکمہ تعلیم کے ملازم نیاز احمد کا کہنا ہے کہ بچے کو دیکھ کر وہ مایوس ہو گیا تھا کہ اب یہ ہمیشہ کے لئے معذور ہوگیا ہے۔ڈاکٹر سید آصف شاہ مایہ ناز پلاسٹک سرجن ہیں جو اس سے پہلے بھی کئی غیرمعمولی آپریشن کر چکے ہیں۔ عبدالواسع کا آپریشن کرتے ہوئے وہ بھی پرامید تو تھے لیکن اس مقام سے کٹے ہوئے بازو کا آپریشن ان کے لئے پہلا تجربہ تھا۔ ان کے مطابق عبد الوسع کے بازو کی ایک بڑی اور تین چھوٹی رگوں سمیت ہڈی اور چھ مسلز مکمل طور پر کٹ چکے تھے۔سرجری کے بعد عبد الواسع کے ہاتھ کو دوبارہ جوڑ دیا گیا ہے اور وہ حرکت کرنے کے قابل بھی ہے۔ ڈاکٹر آصف کے اس کار نامے نے خیبر پختونخوا میں پلاسٹک سرجری کے میدان میں نئی راہیں متعین کر دی ہیں۔نو سالہ عبد الواسع کرکٹ کا شوقین ہے۔ خیبر پختونخوا میں اپنی نوعیت کی اس پہلی سرجری نے اسے اس قابل کر دیا ہے کہ یہ اپنے خوابوں کو حقیقت کا رنگ دے سکے۔