لندن (این این آئی) پاکستان تحریک انصاف کے چیئرمین عمران خان کی سابق اہلیہ جمائما خان نے کہا ہے کہ انہیں اپنی زندگی میں سیاست کی ضرورت نہیں ، وہ سیاسی لڑائیوں سے دور رہنے کیلئے سیاسی معاملات میں بحث کرنے اور حصہ لینے سے گریز کرتی ہیں۔
یہ بات انہوںنے برطانوی سوشلائٹ اور رومانوی کامیڈی واٹس لَو گاٹ ٹو ڈو وِد اِٹ کی ہدایتکار اور مصنف جمائما خان نے ایک انٹرویو میں کہی، انٹرویو کی ریکارڈنگ شروع ہونے سے پہلے جمائما خان نے ہلکے پھلکے لہجے میں کہا کہ انہیں سیاست کو اپنی زندگی سے باہر رکھنے کی ضرورت ہے۔ انٹرویو میں جمائما نے پاکستان اور سابق وزیراعظم عمران خان کی اہلیہ کے طور پر پاکستان میں گزارے 10 سال کے بارے میں جذباتی انداز میں بات کی، جمائما نے بتایا کہ وہ جان بوجھ کر سیاسی معاملات سے دور رہتی ہیں تاکہ سیاست سے جڑے تنازعات سے دور رہیں۔ جمائما خان نے واٹس لَو گاٹ ٹو ڈو وِد اِٹ لکھا جو 2022 کی ایک برطانوی رومانٹک کامیڈی ڈرامہ فلم ہے جس کی ہدایت کاری شیکھر کپور نے کی ہے، فلم میں للی جیمز، شہزاد لطیف، شبانہ اعظمی، ایما تھامسن، سجل علی، اولیور کرس، عاصم چوہدری اور جیف مرزا شامل ہیں۔ یاد رہے کہ دو ہفتے قبل جمائما خان اور ان کے بھائی بین گولڈ اسمتھ پاکستان کے سیلاب زدگان کیلئے اقوام متحدہ کے بین الاقوامی چلڈرن ایمرجنسی فنڈ (یونیسیف) پاکستان فلڈز اپیل اور پاکستان انوائرمنٹ ٹرسٹ کی مدد میں1 لاکھ 50ہزار پائونڈز سے زائد رقم جمع کرنے میں کامیاب ہوئے،بہن بھائیوں نے گزشتہ رات وسطی لندن میں ایک چیریٹی ڈنر کا اہتمام کیا جس میں 100 سے زائد پاکستانی اور بھارتی شخصیات نے شرکت کی،
عشائیہ میں شرکت کرنے والے مہمانوں میں لندن کے میئر صادق خان، ناول نگار فاطمہ بھٹو، برطانوی پریزینٹرز نورین خان اور سیم ناز، پاکستان کیلئے بیرون ملک سرمایہ کاری کے مشیر ذیشان شاہ اور پاکستان میں برطانیہ کے سابق ہائی کمشنر ایڈم تھامسن بھی شامل تھے۔
یونیسیف کی سفیر کے طور پر جمائما نے کہا کہ وہ اس تباہی سے متاثرہ بچوں اور خاندانوں کی مدد کیلئے اہم فنڈز اکٹھا کرنے میں مدد کر رہی ہیں۔انہوںنے کہاکہ پاکستان انوائرمنٹ ٹرسٹ جس کی بنیاد میرے بھائی بین نے رکھی تھی، ایک ایسے ملک میں موسمیاتی تبدیلیوں سے نمٹنے کیلئے کام کر رہا ہے
جسے عالمی ماحولیاتی بحران کے کچھ انتہائی مشکل اثرات کا سامنا ہے، ان دو عظیم اسباب کو جس چیز کی پہلے سے زیادہ ضرورت ہے وہ ہے مالی مدد لہٰذا بین اور مجھے پاکستان کے لوگوں کیلئے آگاہی پیدا کرنے اور انتہائی ضروری فنڈز اکٹھا کرنے پر خوشی ہے۔
