لاہور(مانیٹرنگ،این این آئی) سابق وزیراعظم عمران خان نے لاہور میں اپنی رہائش گاہ پر سینئر صحافیوں سے بات چیت کرتے ہوئے کہا کہ عام انتخابات کی تاریخ کا اعلان نہ ہوا تب بھی سڑکوں پر احتجاج کا آپشن زیر غور ہے، ان کا کہنا تھا کہ ابھی ان کے پاس کئی کارڈز باقی ہیں، کھیلیں گے تو پی ڈی ایم کے رونگٹے کھڑے ہو جائیں گے،
انہوں نے موجودہ معاشی تباہی کا ذمہ دار اسحاق ڈار کو قرار دیا۔ دوسری جانب پاکستان تحریک انصاف کے چیئرمین اورسابق وزیراعظم عمران خان نے کہاہے کہ خود کو محفوظ نہیں سمجھتا، ریلیوں میں بلٹ پروف اسکرین استعمال کروں گا۔برطانوی نشریاتی ادارے کو انٹرویو دیتے ہوئے عمران خان نے کہاکہ یہ الیکشن کا سال ہے تو ظاہر ہے ہم عوامی ریلیاں نکالیں گے، سیاسی جماعتیں ایسا ہی کرتی ہیں۔عمران خان نے ایک بار پھر اس خدشے کا اظہار کیاکہ مجھے نااہل کرنے کی پوری کوشش کی جا رہی ہے، میرے خلاف نئے نئے مقدمے بنائے جا رہے ہیں لیکن ایسا کوئی کیس نہیں جو مجھے نااہل کر سکے۔سکیورٹی خدشات کے حوالے سے عمران خان نے کہاکہ میں خود کو محفوظ نہیں سمجھتا، مزید احتیاط کروں گا، انتخابی جلسوں اور ریلیوں میں بلٹ پروف اسکرین استعمال کروں گا۔چیئرمین پی ٹی آئی نے کہاکہ چھپ کر بیٹھنے کا سوال ہی پیدا نہیں ہوتا، میں انتخابی مہم کے لیے باہر نکلوں گا۔انہوں نے کہا کہ معاشی استحکام آزادانہ اور منصفانہ انتخابات سیہی ممکن ہے، آزادانہ انتخابات سے مقبول عوامی مینڈیٹ والی حکومت ہی معاشی مسائل حل کر سکتی ہے، فوری انتخابات نہ ہوئے تو موجودہ اقتصادی صورت حال مزید خراب ہو گی، ہمیں سری لنکا کی طرح کے معاشی حالات کا سامنا کرنا پڑ سکتا ہے۔
