لاہور ( ین این آئی) انسپکٹر جنرل پولیس پنجاب عامر ذوالفقار خان نے 5روز کے اندر تمام اضلاع میں کم از کم ایک تھانے میں خاتون ایس ایچ او کی تعیناتی کا حکم دیتے ہوئے کہا ہے کہ خواتین پولیس اہلکاروں کی استعداد کار میں اضافے کیلئے انہیں شارٹ ریفریشر کورسز باقاعدگی سے کروائے جائیں۔
آئی جی پنجاب عامر ذوالفقار خان کی زیر صدارت سیف سٹی ہیڈ کوارٹرز قربان لائنز میں اعلی سطحی اجلاس ہوا ۔اجلاس میں ایڈیشنل آئی جی ٹریننگ، ڈی آئی جی ویلفیئر، اے آئی جی ایڈمن اینڈ سکیورٹی، یو ایس آئی پی کے کنٹری ڈائریکٹر عمران خان، کونسل فار ہیومن رائٹس کے ایگزیکٹو ڈائریکٹرشفیق چوہدری سمیت دیگر افسران بھی موجود تھے۔ اجلاس میں ویمن پولیس کانفرنس کے آئندہ لائحہ عمل اور خواتین پولیس اہلکاروں کے پیشہ ورانہ امور بارے تبادلہ خیال کیا گیا۔ آئی جی پنجاب نے 5روز کے اندر تمام اضلاع میں کم از کم ایک تھانے میں خاتون ایس ایچ او کی تعیناتی کا حکم دیتے ہوئے کہا کہ ایڈیشنل آئی جی ٹریننگ مقررہ وقت میں خواتین ایس ایچ اوز کی تعیناتی یقینی بنا کر رپورٹ بھجوائیں۔تمام اضلاع میں قائم ویمن ہیلپ ڈیسکوں پر خواتین اہلکاروں کی تعیناتی کو ہر صورت یقینی بنایا جائے،سماجی مسائل اور جرائم کی شکار خواتین شہریوں کی مدد میں خواتین پولیس اہلکار اپنا کردار بڑھ چڑھ کر ادا کریں، خواتین پولیس اہلکاروں کی استعداد کار میں اضافے کیلئے انہیں شارٹ ریفریشر کورسز باقاعدگی سے کروائے جائیں۔ آئی جی پنجاب نے کہا کہ سی سی پی او لاہور قلعہ گجر سنگھ پولیس لائنز میں لیڈیز پولیس ہاسٹل میں مزید بہتر ماحول اور سہولیات کی فراہمی یقینی بنائیں۔تمام اضلاع میں دوران ڈیوٹی اچھی کارکردگی کا مظاہرہ کرنے والی خواتین اہلکاروں کی حوصلہ افزائی وقت کی اہم ضرورت ہے۔ جس ریجن کا دورہ کروں وہاں اچھی کارکردگی کی حامل خواتین ملازمین کو تعریفی اسناد اور انعامات کے لیے نامزد کیا جائے۔
