نئی دہلی ( این این آئی) بھارتی وکٹ کیپر رشبھ پنت کا خوفناک ٹریفک حادثے میں زخمی ہونے کے 16 دن بعد پہلا پیغام سامنے آگیا۔رشبھ پنت نے سوشل میڈیا اکائونٹ پر لکھا کہ میرا آپریشن کامیاب رہا اور اب ریکوری کا عمل شروع ہوگیا ہے، میں آنے والے چیلنجز کے لیے تیار ہوں۔انہوں نے لکھا کہ حوصلہ دینے اور نیک خواہشات کا اظہار کرنے والے مداحوں ،ساتھی کرکٹرز، ڈاکٹرز اور دیگر لوگوں کا تہہ دل سے شکریہ ادا کرتا ہوں۔بھارتی کرکٹر نے روڈ حادثے کے بعد مدد اور ہسپتال پہنچانے والے 2 نوجوانوں کا بھی شکریہ ادا کیا۔یاد رہے کہ 30دسمبر کو وکٹ کیپر بیٹر کی گاڑی کو گھر واپس جاتے ہوئے دہلی کے ہائی وے پر اتراکھنڈ کے قریب حادثہ پیش آیا تھا۔وکٹ کیپر بیٹر کی کار کو ہائی وے کی ریلنگ سے ٹکرانے کے بعد آگ لگ گئی تھی۔