لاہور ( این این آئی)سابق صدر سپریم کورٹ بار احسن بھون نے بھی نگراں وزیر اعلیٰ پنجاب کا عہدہ سنبھالنے سے معذرت کر لی۔ مسلم لیگ (ن) کے مرکزی رہنما و پنجاب اسمبلی کے قائد حزب اختلاف حمزہ شہباز کے نمائندے ملک احمد خان نے
اپنی ٹویٹ میں بتایا کہ نگراں وزیر اعلی پنجاب کے تقرر کے لیے مسلم لیگ (ن) نے مشاورت کے بعد سابق صدر سپریم کورٹ بار احسن بھون کے نام پر بھی اتفاق کیا لیکن انہوں نے اس پر شکریہ ادا کرتے ہوئے وکلاء سیاست کی ذمے داریوں اور تقاضوں کی بنا پر معذرت کی ہے۔یاد رہے کہ اس سے قبل مسلم لیگ (ن) نے ناصر سعید کھوسہ کے نام پر اتفاق کیا مگر انہوں نے بھی نگراں وزیر اعلیٰ کے عہدے سے معذرت کی تھی۔خیال رہے کہ وزیر اعلیٰ پنجاب چوہدری پرویز الٰہی نے نگراں وزیرِ اعلی کے لیے گورنر کو 3 نام بھجوائے تھے جن میں احمد نواز سکھیرا، ناصر محمود کھوسہ اور محمد نصیر خان کے نام تجویز کیے گئے تھے۔
