مدینہ منورہ(این این آئی)مسجد نبوی ۖ میں انسانی ہمدردی اور اعلی اخلاق پر مبنی ایک واقعہ پیش آیا۔ ایک سعودی شیخ نے اسلام کے اعلی اخلاق اور رحم دلی کا مظاہرہ کرتے ہوئے پاکستانی کو اس وقت اپنی چادر اوڑھا دی جب وہ سردی میں سو رہا تھا۔ رحم دلی اور انسانی جذبات پر مبنی اس اقدام کو ویڈیو سوشل میڈیا پر شیئر کردی گئی تو بڑے پیمانے پر لوگوں نے اس عمل کی ستائش کی۔شیخ جبیر بن حمود مسجد میں تلاوت قرآن میں مصروف تھے کہ انہوں نے قریب ہی ایک پاکستانی کو سردی میں سوتے ہوئے دیکھا تو ان سے رہا نہ گیا اور انہوں نے پاکستانی شہری کو سردی سے بچانے کیلئے اپنی چادر اوڑھا دی۔ ایک ٹوئٹر صارف نے کہا یہ شیخ مدینہ منورہ کے رہائشی ہیں۔ شیخ کو ان کے انسانی جذبات کے لیے دعائیں دی گئیں ، لوگوں نے کہا شیخ دوسروں کااحساس کرنے کے حوالے سے ایک رول ماڈل ہیں۔