اسلام آباد (این این آئی)مسلم لیگ (ن) کے سینئر رہنماء طلال چودھری نے کہا ہے کہ توشہ خانہ ملکی تاریخ کا سب سے بڑا سکینڈل ہے،پہلے مرید چور نکلا پھر مرشد بھی چور نکلی،حجاز مقدس ننگے پائوں جانیوالا ان سے ملے تحائف بیچتا رہا،لیول پلائنگ فیلڈ کے بعد صاف اور شفاف الیکشن ہوگا،ملک میں استحکام ہوگا تو ہی سیاست ہوگی،

یہ وقت غریب کیلئے سوچنے کا ہے۔جمعرات کو پریس کانفرنس کرتے ہوئے سینئر مسلم لیگی رہنماء طلال چودھری نے کہا کہ توشہ خانہ پاکستان کی تاریخ کا سب سے بڑا سکینڈل ہے، عمران خان کو دو ممالک سے تقریبا 6 ارب مالیت کے تحائف ملے،6ارب کے تحائف کی قیمت 3 کروڑ لگوائی گئی،بشری بی بی کے نام سے جیولری کی رسیدیں بنوائی گئیں۔ انہوں نے کہا کہ پہلے مرید چور نکلا پھر مرشد بھی چور نکلی۔ انہوں نے کہا کہ حجاز مقدس ننگے پائوں جانے والا ان سے ملے تحائف بیچتا رہا،عمران خان نے ضوابط کے برخلاف تحائف توشہ خانہ میں جمع کرائے بغیر ہی بیچ دیئے۔انہوں نے کہا کہ عمران خان نے الیکشن کمیشن کو دی گئی تفصیلات میں بیٹی کا نام چھپایا،خان صاحب !صادق و امین ناجائز کاموں میں ملوث نہیں ہوتے۔انہوں نے کہا کہ عمران خان نے زکوۃ چھوڑی ، نہ گھڑی اور نہ کسی کا مال۔انہوں نے کہا کہ عمران خان نے اگر چوری نہیں کی تو تلاشی کیوں نہیں دے رہے؟۔ انہوں نے کہا کہ لیول پلائنگ فیلڈ کے بعد صاف اور شفاف الیکشن ہوگا۔ انہوں نے کہا کہ پاکستان میں سب ادارے آئین و قانون کی حدود میں رہ کر کام کر رہے ہیں۔ انہوں نے کہا کہ ملک میں استحکام ہوگا تو ہی سیاست ہوگی،یہ وقت غریب کیلئے سوچنے کا ہے۔