لندن (نیوز ڈیسک) دنیا کے مشہور ترین عملی مرکز کیمبرج یونیورسٹی نے ایک نہایت جامع تحقیق کے بعد انکشاف کیا ہے کہ لمبی جوانی اور قابل رشک صحت کیلئے مہنگی غذاﺅں یا جادوئی ادویات کی نہیں بلکہ روزانہ صرف 20 منٹ سبک رفتار چہل قدمی کی ضرورت ہوتی ہے۔
یونیورسٹی نے اس تحقیق میں 3,34,000 افراد کا مطالعہ کیا جس کے بعد معلوم ہوا کہ روزانہ ہلکی پھلکی ورزش بھی انسان کی صحت میں غیر معمولی اضافہ کرتی ہے جبکہ ورزش بالکل نہ کرنا اور نہایت کاہل اور آرام پرست طرز زندگی اپنانا ہر سال لاکھوں اموات کا باعث بنتا ہے۔سائنسدانوں کا کہنا ہے کہ روزانہ 20 منٹ کی تیز واک سے قبل از وقت موت کا خدشہ ایک تہائی کم ہوجاتا ہے۔ ماہرین نے اوسط عمر سے پہلے بوجہ بیماری مرنے کو قبل از وقت موت گردانا ہے۔ تحقیق کے مطابق جن لوگوں کا وزن نارمل ہے انہیں روزانہ واک سے 30 فیصد اضافی طویل صحت مند زندگی کا تحفہ ملتا ہے جبکہ موٹاپے کے شکار افراد کو بھی اوسط زندگی کی نسبت 16 فیصد اضافی صحتمند زندگی کی نعمت میسر آتی ہے۔ ماہرین نے یہ بھی تجویز کیا ہے کہ ہفتے میں اوسطاً کل 150 منٹ ورزش ضرور کی جائے اور اسے دس دس منٹ کی نشستوں میں کیا جائے.یہ اہم مضمون اہم تحقیق امریکی سائنسی جریدے امریکن جنرل آف کلینکل نیوٹریشن میں شائع ہواہے