پشاور(این این آئی)پاکستا ن تحریک انصاف کے رہنماء و سابق اسپیکرقومی اسمبلی اسدقیصر نے کہا ہے کہ تمام نشستیں جیت کرعمران خان نے ثابت کردیا کہ عوام میں پی ڈی ایم غیرمقبول ہے ،اس وقت ملک میں تمام مسائل کا حل فوری انتخابات ہیں ۔ ان خیالات کا اظہار سابق اسپیکرقومی اسمبلی اسدقیصر نے جمعیت علماء اسلام کے

منحرف ارکان مولانا گل نصیب اور دیگر کے ہمراہ پشاور پریس کلب میں پریس کانفرنس کرتے ہوئے کیا ۔سابق سپیکر قومی اسمبلی اسد قیصر نے کہاکہ عمران پرٹوٹل چارگولیاں لگی ہیں اورہسپتال کے ایکسرے موجودہیں، امیدہے کہ سپریم کورٹ کے حکامات پرعمران پرحملہ کامقدمہ درج کیاجائیگا ۔انہوںنے کہا کہ لا نگ مارچ میں جانے کیلئے مکمل پلان بنارہے ہیں ، پنجاب سے شاہ محمود قریشی اورخیبرپختونخواسے لانگ مارچ کی قیادت صوبے کے رہنماء کرینگے ۔انہوںنے کہا کہ کورکمانڈرہائوس کیسامنے احتجاج کی حوصلہ افزائی نہیں کرتے ہیں،پاک فوج کوہم کبھی بدنام نہیں کرینگے، صرف ایک شخص کا مسئلہ تھا،اس کانام لیاہے، آرمی کیخلاف نعروں کی حمایت نہیں کرتے، یہ کسی کی انفرادی سوچ ہوسکتاہے۔ پریس کانفرنس سے مولانا گل نصیب نے خطاب میں کہا کہ پی ڈی ایم نے2018کے انتخابات کے بعد فوری انتخابات کامطالبہ کیاتھا،تحریک انصاف نے استعفیٰ دے دیاہے، پی ڈی ایم اپنے مطالبہ کی پاسداری کرتے ہوِئے مستعفی ہوجائے گل نصیب نے کہا کہ پی ڈی ایم کابیانیہ تضادات کامجموعہ ہے ،ضمنی انتخابات میں پوری قوم نے ان کومستردکردیا ہے اس موقع پر شجاع المک نے کہا کہ ریاست مدینہ بنانے کیلئے ہم نے پی ٹی ائی کیساتھ معاہدہ کیاہے۔