لاہور (آن لائن) ترجمان پنجاب پولیس نے شاہ محمود قریشی کی طرف سے پنجاب پولیس کی وردی کے لئے نازیبا الفاظ کا استعمال پر رد عمل کا اظہار کرتے ہوئے کہا ہے کہ سینئر سیاستدان شاہ محمود قریشی کی جانب سے ہزاروں شہداء کی امین پنجاب پولیس کی وردی کو گالی دینا شدید افسوسناک ہے۔
ترجمان پنجاب پولیس نے کہا کہ وزیر آباد کا واقعہ افسوسناک ہے جس میں جاں بحق اور زخمی ہونے والے تمام افراد کی ساتھ دلی ہمدردی ہے، اِس سانحے پر سیاسی جماعت کی طرف سے الزامات کی نوعیت اور اُن کی حساسیت کے پیشِ نظر مقامی پولیس کی طرف سے انتہائی احتیاط ناقابلِ فہم نہیں۔ ترجمان پنجاب پولیس نے کہا کہ حساس قومی اور سیاسی تنازعات سے جڑے مقدمات میں احتیاط کوئی نئی بات نہیں، ماضی قریب میں مختلف سیاسی اور قومی رہنماؤں کے خلاف قومی اداروں اور مذہبی جذبات کی توہین جیسے الزامات کی درخواستوں پر بھی ایسی ہی احتیاط کا مظاہرہ کیا گیا۔ ترجمان پنجاب پولیس نے کہا کہ اِن سیاسی رہنماؤں میں شاہ محمود قریشی کی پارٹی کے رہنما بھی شامل ہیں، پولیس تمام سیاسی اور گروہی مفادات سے بالاتر ہو کر اپنے فرائض سرانجام دے رہی ہے۔ ترجمان پنجاب پولیس نے کہا کہ حکومت سے توقع ہے کہ حکومت میں شامل جماعت کے رہنما کی طرف سے پولیس کی وردی کی توہین کا نوٹس لیا جائے گا۔
