کولمبو(نیوز ڈیسک)کولمبو ٹیسٹ میں بدمزگی کے واقعات پر بھارتی فاسٹ بولر ایشانت شرما اور دنیش چندیمل پر ایک ایک میچ کی پابندی عائد کردی گئی، دونوں کو یہ سزا آئی سی سی کوڈ آف کنڈکٹ کے تحت دی گئی۔سری لنکن کرکٹرز دھمیکا پرساد اور لاہیرو تھریمانے پر میچ فیس کا 50، 50 فیصد جرمانہ عائد کیاگیا، ایشانت کو 2معطل پوائنٹس کی سزا بھی ملی، وہ نومبر میں جنوبی افریقہ کیخلاف شیڈول موہالی ٹیسٹ میں حصہ نہیں لے پائیں گے،چندیمل کو ایک میچ سے معطل کیا گیا، وہ ویسٹ انڈیز سے ہوم سیریز کا پہلا ون ڈے نہیں کھیل سکیں گے۔چاروں پلیئرز میں جھگڑا ہوا تھا، ایشانت نے چوتھی اننگز میں سری لنکن اوپنر اپل تھارنگا کوآؤٹ کرنے کے بعد پویلین کا راستہ دکھانے کا اشارہ کیا تھا، اس پر بھی ان کیخلاف کارروائی عمل میں لائی گئی، ایشانت 2مختلف واقعات پر میچ فیس کا 65 فیصد حصہ بطورجرمانہ بھی بھریں گے، انھیں آئندہ 12 ماہ میں خراب رویے برتنے پر مخصوص مدت کے لیے معطل بھی کیا جا سکتاہے۔