کراچی (نیوز ڈیسک) اسپیشل برانچ کے مینوئل سسٹم اور خستہ حال ریکارڈ کے باعث ہزاروں غیر ملکی پاکستانی شہری بننے میں کامیاب ہو گئے۔ذرائع کے مطابق اس سال 6مئی کو ایف آئی اے،اسپیشل برانچ، نادرا ،نارا اور محکمہ پاسپورٹ کے افسران کا ایک مشترکہ اجلاس ہوا تھا جس میں اس بات پر غور کیا گیا تھا کہ اسپیشل برانچ کے مینول سسٹم کی وجہ سے ہزاروں غیر ملکی پاکستانی شہریت حاصل کرنے میں کامیاب ہو گئے ہیں۔روز نامہ جنگ کے رپور ٹر ثا قب کی رپور ٹ کے مطا بق اجلاس میں طے پایا تھا کہ اسپیشل برانچ کے سسٹم کو کمپیوٹرائز کیا جائے گا اور اسے نارا اور نادرا سے لنک کیا جائے گا تا ہم تین ماہ گذر جانے کے باوجود ان فیصلوں پر عملدرآمد نہیں ہوسکا۔ذرائع کا کہنا ہے کہ بائیو میٹرک سسٹم اور الیکٹرونک کیمرہ کے لیئے صرف 15سے 20لاکھ روپے درکار ہیں۔ذرائع کا کہنا ہے کہ کمپیوٹرائز سسٹم نہ ہونے کی وجہ سے اسپیشل برانچ کے کرپٹ افسران و اہلکاروں کی مدد سے غیر ملکی افراد نے نادرا کے برتھ سرٹیفیکیٹس،قومی شناختی کارڈ اور پاکستانی پاسپورٹ بھی حاصل کر رکھے ہیں اور ان پاسپورٹس کی بنیاد پر وہ دیگر ممالک میں ملازمتیں بھی کر رہے ہیں۔یاد رہے کہ گذشتہ دنوں ایف آئی اے کی تفتیش کے دوران انکشاف ہوا تھا کہ یہ غیر ملکی کئی پاکستانی خاندانوں کا حصہ بھی بن چکے ہیں۔