لاہور ( این این آئی) گرینڈ جامع مسجد بحریہ ٹائون لاہور میں نمازجمعہ کے بعد رسول اکرمؐ کے موئے مبارک کی زیارت کروائی گئی،عاشقان رسول صلی اللہ علیہ والہ وسلم کی بڑی تعداد نے نماز جمعہ تا نماز عصراور خواتین نے نماز عصر تا نماز مغرب زیارت کی۔
زائرین کے لبوں پرجاری درود وسلام سے فضاء معطر رہی۔تفصیلات کے مطابق بحریہ ٹائون انتظامیہ کی جانب سے گرینڈ جامع مسجد بحریہ ٹائون لاہور میں جمع المبارک کے عظیم الشان اجتماع کے بعد آقائے دو جہاں حضرت محمد صلی اللہ علیہ والہ وسلم کے موئے مبارک کی زیارت کا اہتمام کیا گیا۔فضا درود وسلام سے گونجتی رہی۔ نامور اکابرین ،مذہبی رہنمائوں، نامور علمائے کرام سمیت عاشقان رسول کی بڑی تعداد نے بحریہ ٹائون لاہور کی گرینڈ جامع مسجد کا رخ کیا اور موئے مبارک کی زیارت کی۔ممتاز عالم دین مولانا حافظ فضل الرحیم اشرفی نے گرینڈ جامع مسجد بحریہ ٹائون لاہور میں نماز جمعہ پڑھایا اور اپنے خطاب میں موئے مبارک کی اہمیت پر روشنی ڈالی۔نمازِ جمعہ اور موئے مبارک کی زیارت کے بعد امتِ مسلمہ میں قیامِ امن ،پاکستان کی خوشحالی اور بحریہ ٹائون کی کامیابی کیلئے خصوصی دعائیں مانگی گئیں۔
