لاہور(نیوزڈیسک)لاہور ہائیکورٹ نے سابق ٹیسٹ کرکٹر اعجاز احمد جعلی چیک کے اخراج مقدمہ کی درخواست پر فریقین کے وکلاءکو حتمی بحث کے لئے طلب کر لیا ۔ گزشتہ روز لاہور ہائیکورٹ کے جسٹس انوار الحق نے اعجاز احمد کی درخواست پر سماعت کی۔ ملزم کے وکیل فاروق امجد میر نے موقف اختیار کیا کہ گلبرگ پولیس نے شوکت حیات کی درخواست پر سال 2007ءمیں جعلی چیک دینے کے الزامات کے تحت جھوٹا اور بے بنیاد مقدمہ درج کیا ، مدعی مقدمہ نے ایف آئی آر میں اعجاز احمد پر کاروباری شراکت داری کے سلسلے میں ایک کروڑ پانچ لاکھ روپے کا جعلی چیک دینے کا الزام عائد کیا ہے جبکہ شوکت حیات ملزم کا ڈرائیور تھا ،ملزم اعجاز احمد نے مدعی مقدمہ کو کوئی چیک نہیں دیا پولیس نے بے بنیاد مقدمہ درج کیا ہے لہٰذا جعلی چیک کا مقدمہ خارج کرنے کاحکم دیا جائے۔ عدالت نے اخراج مقدمہ کی درخواست پر مزید سماعت دس ستمبر تک ملتوی کرتے ہوئے مقدمہ کے مدعی سمیت فریقین کے وکلاءکو حتمی بحث کے لئے طلب کر لیا ہے۔