لاہور( این این آئی)سوئی ناردرن گیس پائپ لائنز لمیٹڈ نے دور دراز علاقوں میں گیس کے انتہائی کم پریشر کا سامنا کرنے والے صارفین کو لیکوئیفائیڈ پیٹرولیم گیس سلنڈر فراہم کرنے کا منصوبہ بنایا ہے ۔رپورٹ کے مطابق کمپنی کی جانب سے پنجاب کے مختلف علاقوں میں

رہنے والے 10 لاکھ ایسے صارفین کی نشاندہی کی گئی ہے۔پٹرولیم ڈویژن کے ایک عہدیدار نے بتایا کہ ایس این جی پی ایل کے ایک سینئر افسر کو ایل پی جی سپلائی آپریشن کو انجام دینے کا کام سونپا گیا ہے۔چونکہ یہ اقدام عوامی مفاد میں کیا جا رہا ہے اس لیے صارفین کو ایل پی جی نو پرافٹ نو لاس ماڈل یعنی بغیر کسی منافع یا نقصان کے فراہم کی جائے گی۔پنجاب اور خیبرپختونخوا ہ میں ایس این جی پی ایل کے 70 لاکھ صارفین ہیں جن میں اکثریت گھریلو صارفین کی ہے، گیس کے مقامی ذخائر میں کمی اور بڑھتی ہوئی طلب کی وجہ سے کمپنی کو کئی برسوں سے گیس کی قلت کا سامنا ہے۔ایس این جی پی ایل نے صنعت، بجلی اور دیگر شعبوں کی طلب کو پورا کرنے کے لیے قطر سے ایل این جی کی درآمد بھی شروع کر دی ہے، بڑھتی ہوئی طلب کی وجہ سے ایل این جی سپلائی میں ایل این جی کا حصہ تقریباً 55 فیصد تک بڑھ گیا ہے۔ایل پی جی سپلائی آپریشن شروع کرنے سے قبل ایس این جی پی ایل پرنٹ، الیکٹرانک اور سوشل میڈیا پر بڑے پیمانے پر عوام کے لیے آگاہی مہم چلانے کا ارادہ رکھتی ہے۔بتایا گیا ہے کہ ایل پی جی کی فراہمی کا منصوبہ فی الحال صرف پنجاب تک محدود ہے کیونکہ خیبرپختونخوا میں گیس کی کوئی کمی نہیں ہے۔