ابوظیبی(نیوزڈیسک)متحدہ عرب امارات کی وزارت توانائی نے ماہ ستمبر کے لیے پٹرول کی فی لیٹر قیمت میں 8.4 فی صد کمی کا اعلان کردیااس کے مطابق آیندہ ماہ خصوصی پٹرول کی فی لیٹر نئی قیمت 0.53 ڈالر(1.96)درہم ہوگی،میڈیارپورٹس کے مطابق امارات کی وزارت توانائی نے عالمی سطح پر تیل کی قیمتوں میں کمی کے رجحان کے پیش نظر یہ فیصلہ کیا ہے۔اگست کے اوائل میں اماراتی حکومت نے اپنے بجٹ میں توازن پیدا کرنے کے لیے پٹرول پر طویل عرصے سے دیے جانے والے زر تلافی(سب سڈی)کو بھی ختم کردیا تھا۔اس کی وجہ سے پٹرول کی قیمتوں میں 24 فی صد اضافہ ہوگیا تھا۔اس کے ساتھ ساتھ حکومت نے ڈیزل کی قیمت میں کمی تھی اور صنعتی استعمال والی گاڑیوں کے لیے ڈیزل کی فی لیٹر کم قیمت مقرر کی تھی۔واضح رہے کہ 2014 سے عالمی مارکیٹ میں تیل کی قیمتوں میں مسلسل کمی جاری ہے۔اس وجہ سے متحدہ عرب امارات کو تیل کی برآمد سے حاصل ہونے والی آمدن میں بھی نمایاں کمی واقع ہوچکی ہے لیکن اسی ماہ زرتلافی کے خاتمے کے بعد اس کے قومی خزانے کو تیل کی مد میں آمدن سے فائدہ پہنچے گا۔عالمی مالیاتی فنڈ (آئی ایم ایف) کے اندازے کے مطابق یو اے ای کو اس مالی سال کے دوران 2009 کے بعد پہلی مرتبہ بجٹ خسارے کا سامنا کرنا پڑے گا۔اس کے تخمینے کے مطابق یواے ای ہرسال پٹرولیم مصنوعات کی قیمتوں پر زرتلافی کی مد میں سات ارب ڈالرز خرچ کرتا ہے۔یو اے ای نے زرتلافی ختم کیے جانے کے بعد اب تیل کی قیمتیں مقرر کرنے کا بھی نیا نظام وضع کیا ہے اور حکومت کی ایک کمیٹی ہر ماہ کی 28 تاریخ کو آیندہ ماہ کے لیے پٹرولیم مصنوعات کی نئی قیمتوں کا اعلان کیا کرے گی۔یہ قیمتیں عالمی مارکیٹ میں تیل کی اوسط قیمت اور پیداواری لاگت کی بنیاد پر مقرر کی جائیں گی۔