لاہور(این این آئی)وزیر اعلی پنجاب چودھری پرویزالٰہی اور سابق وفاقی وزیر مونس الہی نے گجرات میں کنجاہ ہاؤس آمد پرچیئرمین پاکستان تحریک انصاف عمران خان کا خیر مقدم کیا-سابق وفاقی وزیر چودھری وجاہت حسین، سابق ناظم چودھری ریاض اصغر، اسد عمر،فیصل جاوید، شبلی فراز،حافظ فرحت عباس،

صوبائی وزیر داخلہ ہاشم ڈوگر اور دیگر رہنما بھی موجود تھے -چودھری پرویزالٰہی اور مونس الٰہی نے عمران خان سے ملاقات میں سیاسی صورتحال اور سیلاب زدگان کی بحالی کے اقدامات پر تبادلہ خیال کیا گیا- چودھری پرویزالٰہی نے عمران خان کو سیلاب متاثرین کی بحالی و آباد کاری کے اقدامات سے آگاہ کیا -عمران خان نے چودھری پرویزالٰہی کی قیادت میں پنجاب حکومت کے سیلاب زدگان کی بحالی کے اقدامات کو سراہااور کہا کہ چودھری صاحب۔۔ سیلاب متاثرین کی بحالی کے لئے آپ کی کاوشیں قابل تحسین ہیں۔عمران خان نے کہا کہ چودھری پرویزالٰہی کی قیادت میں متاثرین سیلاب کی بحالی کے اقدامات کو ہر سطح پر پذیرائی ملی ہے۔وزیر اعلی چودھری پرویزالٰہی نے ملاقات کے دوران گفتگو کرتے ہوئے بتایا کہ پنجاب حکومت نے مربوط انداز سے ریسکیو اینڈ ریلیف کام کیا۔پاک فوج، پولیس، انتظامیہ، ریسکیو1122 اور ڈی جی پی ڈی ایم اے کی مشترکہ کوششوں کے بہتر نتائج برآمد ہو رہے ہیں۔عمران خان کی قیادت اور رہنمائی میں سیلاب متاثرین کی آبادی کاری کا کام بھی بطریق احسن پورا کریں گے۔اس سے قبل سابق وفاقی وزیر مونس الٰہی نے گجرات میں جلسے سے خطاب میں کہا کہ جس دن عمران خان نے کہا شہباز شریف کو اسلام آباد میں ہی بند کر دو ہم ادھر ہی بند کر دیں گے، مریم بی بی گجرات میں کارنر میٹنگ کے لیے آئی تھیں، انہوں نے بہت باتیں کیں، میں مریم بی بی کو بتانا چاہتا ہوں،

انہوں نے جلسی کی، یہاں دیکھ یہ اصل میں یہ جلسہ ہے۔سابق وفاقی وزیر نے کہا کہ مریم بی بی سن لیں! ابا جی، چچا جی اور ککڑی، پی ڈی ایم سمیت سب مل جائیں تو عمران خان کے برابر نہیں ہوں گے۔انہوں نے کہاکہ آئندہ الیکشن میں پی ٹی آئی چیئر مین کو یقین دلاتا ہوں میانوالی سے زیادہ لیڈ گجرات سے ملے گی، عمران خان سے درخواست ہے نوجوانوں کو سمجھائیں بچوں کو سمجھائیں، بڑوں کی عزت کریں، گھر میں اختلافات ہوتے رہتے ہیں، لیکن یہ اختلافات تہذیب کے دائرے میں رہ کر ہونے چاہئیں۔