موسمیاتی تبدیلیاں، سعودی عرب کے خشک صحرا میں بھی سیلاب

ریاض (این این آئی)جنوب مشرقی سعودی عرب کے ربع الخالی ریگستان میں نفود الدحی کے علاقے میں بارشوں کے باعث سیلابی ریلے کے مناظر تصاویر اور ویڈیوز کی شکل میں سوشل میڈیا پر سامنے آئے ہیں۔

میڈیارپورٹس کے مطابق ان ویڈیوز میں ربع الخالی صحرا کے کئی مقامات پر پانی کے ریلوں کو بہتے دیکھا جا سکتا ہے۔ یہ امر حیران کن ہے کہ صحرائے ربع الخالی کو دنیا کے خشک ترین مقامات میں شمار کیا جاتا ہے۔سعودی عرب میں ماہر موسمیات ڈاکٹر خالد الزعاق نے وضاحت کرتے ہوئے کہا کہ دنیا اس وقت ایک ایسے دور میں جی رہی ہے جس میں موسمیاتی تبدیلیاں ایک عالمگیر اور ناقابل تردید حقیقت بن چکی ہیں۔ انہوں نے کہا کہ موسمیاتی تبدیلیاں لا محالہ آنے والی ہیں۔انہوں نے مزید کہا کہ یہ تبدیلیاں دو حصوں میں تقسیم ہیں جو کہ عرب ممالک کیلئے مفید ثابت ہوں گی جبکہ ان کے یورپی ممالک اور بعض ایشیائی ممالک پر منفی اثرات مرتب ہوں گے۔