اسلام آباد(این این آئی)سپریم کورٹ کے وزیراعلیٰ پنجاب سے متعلق کیس کے فیصلے پر وفاقی وزیر احسن اقبال نے ردعمل دیتے ہوئے کہاہے کہ یوں لگتا ہے کہ ملک کے درد کا ٹھیکہ صرف مسلم لیگ ن اور اتحادی جماعتوں نے لے رکھا ہے۔احسن اقبال نے سوشل میڈیا پر بیان جاری کرتے ہوئے کہا کہ اتحادی جماعتیں اپنی سیاسی ساکھ داؤ پہ لگا کر ملک اور معیشت کو سنبھالنے پر لگی ہیں ،دیگر اداکار کھیل کھیلنے میں مصروف ہیں۔انہوں نے کہا کہ کیسا ہو اگر پیٹرول کی قیمت 12 اپریل پر واپس لا کر اداکاروں سے کہا جائے کہ چلاؤ معیشت؟۔انہوںنے کہاکہ 2017 میں سپریم کورٹ نے وزیر اعظم کو برطرف کیا جس کے نتائج آج تک قوم بھگت رہی ہے جبکہ 2022 میں پاکستان کے سب سے بڑے صوبے کے وزیر اعلیٰ کو برطرف کیا گیا، اس کے نتائج کیا نکلیں گے آنے والا وقت بتائے گا۔