کراچی (این این آئی)محکمہ موسمیات کی جانب سے سندھ، بلوچستان اور جنوب پنجاب میں جمعرات سے مزید مون سون بارشوں کی پیشگوئی کی گئی ہے۔محکمہ موسمیات کی ایڈوائزی کے مطابق خلیج بنگال سے مون سون ہواؤں ملک کے بالائی اور وسطی علاقوں میں داخل ہو ئیں
14 جولائی سے کم ہوا کا دباؤ سندھ میں شدت کے ساتھ داخل ہوگا، جس کے باعث 14 تا 17 جولائی کراچی، حیدر آباد، بدین، ٹھٹھہ، دادو، تھر پارکر، سانگھڑ اور دیگر شہروں میں گرج چمک کے ساتھ بارش کا امکان ہے۔محکمہ موسمیات کے مطابق، اندرونِ سندھ میں میرپورخاص، مٹھی، جامشورو، لاڑکانہ، جیکب آباد، گھوٹکی میں تیزہواؤں کے ساتھ بارش کا امکان ہے۔سکھر، خیرپور، شکارپور، شہدادکوٹ میں بھی تیزہواؤں اور گرج چمک کیساتھ بارش ہو سکتی ہے۔محکمہ موسمیات کے مطابق بلوچستان کے شہر ژوب، زیارت، بارکھان، بولان کوہلو، قلات، خضدار، لسبیلہ، آواران، نصیر آباد، جھل مگسی، سبی، ڈیرہ بگٹی، تربت اور پسنی میں گرج چمک کے ساتھ موسلا دھار بارش کا امکان ہے۔این ڈی ایم اے نے کہا ہے کہ ملک کے بیشتر علاقوں میں مزید مون سون بارشوں کا امکان، محکمے الرٹ رہیں۔محکمہ موسمیات کی جانب سے جاری کردہ تازہ ترین پریس ریلیز کے مطابق مون سون ہوائیں ملک کے بالائی اور وسطی علاقوں میں مسلسل داخل ہو رہی ہیں جبکہ ہوا کا کم دباؤ شدت کیساتھ سندھ کے علاقوں میں داخل ہو گا جوکہ 14 تا 17 جو لائی تک جاری رہ سکتا ہے.این ڈی ایم اے نے وفاقی، صوبائی و ضلعی ڈیزاسٹر مینجمنٹ اتھارٹیز، جی بی ڈی ایم اے، ایس ڈی ایم اے، پی آئی ڈی اور انکے ماتحت محکموں کو چوکس رہنیاور کسی بھی قسم کی ہنگامی/ ناخوشگوار صورتحال سے نمٹنے کے لیے
تیار رہنے اور تمام ضروری احتیاطی تدابیر اختیار کر نے کی ہدایات جاری کردی ہیں۔محکموں کو مزید ہدایت کی گئی ہے کہ وہ ہنگامی آلات و مشینری بشمول نکاسی آب کے لیے پمپ اور ایمرجنسی عملہ کی پہلے سے دستیابی/تعیناتی یقینی بنائیں، تاکہ کسی بھی قسم کے ہنگامی حالات بالخصوص راستوں /سڑکوں کی بندش کی صورت میں فوری اقدامات کئے جا سکیں۔مزید برآں نشیبی و سیلابی خطرے سے دوچار علاقہ مکینوں کا پہلے سے طے شدہ
محفوظ مقامات پر انخلاء یقینی بنائیں اور مذکورہ پناہ گاہوں میں خوراک و ادویات کی پیشگی دستیابی یقینی بنائیں۔متعلقہ صوبائی و ضلعی محکمے مون سون بارشوں سے منسلک ممکنہ خطرات کے حوالے سے عوامی آگاہی کے لئے اقدامات اٹھائیں، قانون نافذ کرنے والے اداروں اور ٹریفک پولیس کے ذریعے مسافروں اور سیاحوں کو موسمی حالات و راستوں کی صورتحال سے مسلسل آگاہ رکھیں، عوام الناس غیر ضروری سفر/نقل و حرکت سے گریز کریں۔
