باجوڑ ایجنسی(نیوزڈیسک)باجوڑ ایجنسی میں ریموٹ کنٹرول بم دھماکے میں امن کمیٹی اور پیپلز پارٹی کے رہنما ملک محمد خان جاں بحق اور بارودی سرنگ کے دھماکے میں 3 سیکیورٹی اہل کار زخمی ہوگئے۔سیکیورٹی فورسز ذرائع کے مطابق تحصیل ماموند کے علاقے زری میں سڑک کنارے ریموٹ کنٹرول بم دھماکا ہوا،دھماکے میں امن کمیٹی اور پیپلز پارٹی کے رہ نما ملک محمد خان موقع پر جاں بحق ہوگئے واقعہ کے بعد سیکیورٹی فورسز نے علاقے میں سرچ آپریشن شروع کردیا ادھر تحصیل ماموند کے علاقے سپرے میں بارودی سرنگ کے دھماکے میں 3سیکیورٹی اہل کار زخمی ہوگئے واقعہ کے بعد سکیورٹی فورسز نے علاقے میں سرچ آپریشن شروع کر دیا تاہم کسی گرفتاری کی اطلاع نہیں ملی-پاکستان پیپلز پارٹی کے شریک چیئرمین سابق صدر آصف علی زرداری نے اتوار کی صبح باجوڑ ایجنسی کی تحصیل مہمند کے پارٹی صدر پر حملے کی شدید مذمت کی جس میں وہ شہید ہو گئے۔ ایک ریموٹ کنٹرولڈ بم ان کے گھر کے باہر نصب کیا گیا تھا اور صبح جیسے ہی وہ گھر سے باہر نکلے بم پھٹ گیا ۔ سابق صدر نے کہا کہ یہ قربانی رائیگاں نہیں جائے گی۔ انھوں نے حملہ آوروں کی گرفتاری اور سزا کا مظالبہ کیا اور شہید کی فیملی کے لیے مناسب اقدامات کرنے کو کہا۔ سابق صدر نے شہید کے درجات کی بلندی اور خاندان کے لیے صبرِ جمیل کی دعاءبھی کی۔ سابق صدر نے کہا کہ دہشت گردی کے ایسے واقعات پی پی پی اور قوم کے دہشت گردی کے خاتمے کے عزم کو کم نہیں کر سکتے- پاکستان پیپلزپارٹی کے چیئرمین بلاول بھٹو زرداری نے اتوار کی صبح باجوڑ ایجنسی کے تحصیل ماموند میں پاکستان پیپلزپارٹی کے تحصیل صدر ملک محمد خان پررموٹ بم حملے کی شدید الفاظ میں مذمت کی ہے، اس حملے میں پی پی رہنما شہید ہو گئے ، واضح رہے کہ دہشتگردوں نے پیپلزپارٹی کے تحصیل صدر ملک محمد خان کے گھر کے دروازے پر رموٹ کنٹرولڈ بم نصب کردیا تھا، آج صبح محمد جیسے ہی گھر سے نکلے تو بم پھٹ گیا، جس میں وہ شہید ہوگئے، چیئرمین بلاول بھٹو زرداری نے کہا کہ دہشتگرد ملک کے ہر علاقے میں معصوم شہریوں، سیاسی کارکنان اور مسلح فورسز کو نشانہ بنا رہے ہیں،بلاول بھٹو زرداری نے شہید ملک محمد خان کو خراج عقیدت پیش کرتے ہوئے کہا کہ شہید ملک محمد خان نے شہید محترمہ بینظیر بھٹو کے سچے سپاہی ہوتے ہوئے دہشتگردی کے خطرات کا جم کر مقابلا کیا،بلاول بھٹو زرداری نے سوگوار خاندان سے دلی ہمدردی کا اظہار کرتے ہوئے مطالبہ کیا ہے کہ اس دہشتگرد حملے کے ملزمان کو جلد گرفتار کیا جائے