پشاور (آن لائن)پاکستان تحریک انصاف کے سپوکس پرسن وصوبائی وزیر محنت شوکت یوسفزئی نے کہا ہے کہ مولانا فضل الرحمان نہیں بلکہ امریکی ڈالروں نے عمران خان کی حکومت ختم کی ہے، کیا مولانا صاحب عمران خان حکومت کے خاتمے کے بدلے میں ڈالروں

کے ثواب کے بارے میں بتا سکتے ہیں،موجودہ امپورٹڈ حکومت ہر قومی ادارے کو گروی رکھنا چاہتی ہے، اسمبلیاں توڑ کر فوری انتخابات کرائے جائیں،نئے انتخابات کے سوا ملک کے مسائل کا کوئی حل موجود نہیں۔ان خیالات کا اظہار صوبائی وزیر شوکت یوسفزئی نے مولانا فضل الرحمان کے بیان پر ردعمل دیتے ہوئے کیا۔انہوں نے کہا کہ کیاموجودہ مہنگائی کے ذمہ دار بھی مولانا فضل الرحمان خود کو سمجھتے ہیں۔انکا کہنا تھا کہ شہباز شریف اینڈ کمپنی کے پاس ملک چلانے کا کوئی ایجنڈا نہیں ہے،موجودہ مہنگائی نے غریب عوام کی کمر توڑ دی ہے، عمران خان نے دو جولائی کو ملک کے تمام بڑے شہروں میں احتجاج کی کال دی ہے۔شوکت یوسفزئی نے مزید کہا کہ سندہ کے ضمنی انتخابات میں الیکشن کمیشن کو پیپلز پارٹی کی مداخلت نظر نہ آنا افسوسناک ہے، پاکستان کو آئی ایم ایف کا غلام بنایا جارہا ہے۔انہوں نے مزید کہا کہ اسمبلیاں توڑ کر فوری نئے انتخابات کرائے جائیں، نئے انتخابات کے سوا ملک کے مسائل کا کوئی حل موجود نہیں ہے۔شوکت یوسفزئی نے کہا کہ موجودہ امپورٹڈ حکومت ہر قومی ادارے کو گروی رکھنا چاہتی ہے۔