لاہور، اسلام آباد(مانیٹرنگ ڈیسک ، این این آئی ) سنیئر صحافی اور تجزیہ کار رانا عظیم نے نجی ٹی وی پروگرام میں گفتگو کرتے ہوئے کہا ہے کہ مہنگائی کیخلاف احتجاج میں ہزاروں لوگ باہر نکلے، ایسے لگ رہا تھاکہ لوگ زمین سے نکل رہے ہیں، لوگوں نے حکومت کے اس موقف کومسترد کر دیاہے کہ مہنگائی سابق دور میں ہوئی، انہوں نے دعویٰ کیا ہے کہ بڑی عید سے پہلے کچھ قربانیاں ہونےجارہی ہیں۔
حکومت سے معاملات سنبھل نہیں پا رہے ۔10 دن کے اندر تاریخ کا اعلان ہونے لگاہے،اس بار جو لانگ مارچ ہوگا اسے روکنا بھی چاہیں تو نہیں رکے گا، آنے والوں دنوں میں 13 کے قریب بڑی شخصیات تحریک انصاف میں شمو لیت اختیار کرنے جارہی ہیں، بڑی ٹریڈ یونینز ،کسانوں کے گروپ اور تاجر بھی عمران خان کے ساتھ آ رہےہیں۔دوسری جانب پاکستان تحریک انصاف کے چیئرمین عمران خان نے کہا ہے کہ موجودہ حکومت رجیم چینج سازش کا حصہ بنی، سازش تھی یا مداخلت اس کی تحقیقات ہونی چاہیے ، ڈی جی آئی ایس پی آر یہ طے نہیں کر سکتے کہ سازش نہیں تھی۔ سوشل میڈیا انفلوئنسرز سے خطاب کے دوران انہوں ںے کہا کہ میں اس ملک کا وزیراعظم تھا میرے سامنے تحقیقات نہیں آئیں، جو اس سازش میں ملوث ہے وہ چاہتے ہیں خفیہ پیغام کو دبا دیا جائے، عدم اعتماد کے پیچھے مہنگائی کا جھوٹا بیانیہ بنایا گیا۔انہوں نے کہا کہ اگر آپ حکومت نہیں سنبھال سکتے تھے تو کیوں سازش کی؟
عوام اس وقت مہنگائی کے باعث غصے سے بھرے بیٹھے ہیں، روپے کی قدر میں کمی یا پیٹرول کی قیمت بڑھی تھی تو یہ مہنگائی مارچ لے کر پہنچ جاتے تھے، اب خود عوام پر مہنگائی کے بم پھینک رہے ہیں۔چیئرمین پی ٹی آئی نے کہا کہ ان کی اپنی حکومت میں قومی سلامتی کمیٹی نے ہمارا موقف تسلیم کیا، بد قسمتی سے پاکستان کے نامور ڈاکوئوں کو ملک پر مسلط کر دیا گیا۔
انہوں نے کہاکہ نیب میں ترامیم سے ایک ایک ڈاکو کو این آر او ملے گا، ان کے کیسز کی تحقیقات کرنے والے لوگ مر رہے ہیں۔عمران خان نے کہا کہ کوئی ہارٹ اٹیک سے مر رہا ہے کوئی خودکشی کر رہا ہے، مشتاق چینی والا رہ گیا اس کا اگلا نمبر ہے، پاکستان کو اصل مسئلہ ڈالرز کی کمی کا ہے اور اس وقت ملک میں 30 فیصد مہنگائی ہو چکی ہے۔
سابق وزیر اعظم نے کہاکہ بلاول نے مارچ مہنگائی کے نام پر کیا اور وہاں سے نکلا کانپیں ٹانگتی ہیں، 25 مئی کو جس طرح پولیس نے تشدد کیا اس کی مثال نہیں ملتی، جیسی شیلنگ یہاں کی گئی وہ سارا منظر نامہ مقبوضہ کشمیر جیسا تھا، رائیٹ ٹو پروٹیسٹ اور رائیٹ ٹو موومنٹ کو کوئی نہیں روک سکتا۔سابق وزیرا عظم نے کہا کہ سی سی پی او لاہور اور آئی جی اسلام آباد کو خاص ہدایت تھی کہ ظلم کرنا ہے، تیاری کر لیں 10 جولائی سے پہلے کال دے سکتا ہوں۔
