طویل عرصے بعد ملکی برآمدات میں کمی ریکارڈ

لاہور( این این آئی)طویل عرصے بعد ملکی برآمدات میں کمی ریکارڈ کی گئی ہے،گزشتہ ماہ مجموعی برآمدات کا حجم 2.62 ارب ڈالر رہا

جو اس سے پچھلے ماہ اپریل میں2.89 ارب ڈالر تھا۔ وفاقی ادارہ شماریات کے اعدادو شمار کے مطابق مئی میں سبزیوں، گوشت، لیدر،

سپورٹس اور ٹیکسٹائل برآمدات میں کمی ریکارڈ کی گئی جبکہ چاول، سی فوڈ اورپھلوں میں اضافہ ہوا۔ملکی برآمدات میں گزشتہ ایک سال

سے مسلسل اضافہ ہورہا ہے جس کا اندازہ رواں مالی سال کے 11 ماہ کے اعدادو شمار سے بھی لگایا جاسکتا ہے جس کے مطابق

جولائی 2021 تا مئی 2022 ملکی برآمدات میں 28 فیصد اضافہ ہوا ہے۔ اس رجحان کو دیکھتے ہوئے سوال اٹھایا جارہا ہے کہ

مئی میں برآمدات میں کمی کیوں آئی ہے اور کیا یہ کمی عارضی ہے یا آئندہ مہینوں میں بھی یہ رجحان برقرار رہ سکتا ہے۔

پاکستان اپیرل فورم کے چیئرمین محمد جاوید بلوانی نے گفتگو کرتے ہوئے کہا کہ امریکہ، یورپ سمیت کئی ممالک میں کساد بازاری بڑھ رہی ہے

جس کی وجہ سے برآمدی آرڈرز کم ہو رہے ہیں۔جاوید بلوانی کے مطابق خدشہ ہے کہ آئندہ مہینوں میں بیشتر برآمدات خاص طور پر ٹیکسٹائل برآمدات میں کمی کا سلسلہ برقرار رہے گا۔

بجلی اور گیس کی لوڈشیڈنگ سے بھی پیداواری سرگرمیاں متاثر ہورہی ہیں جس کا اثر برآمدات میں کمی کی صورت میں سامنے آرہا ہے۔

موضوعات:ملکی برآمدات