اسلام آباد ، راولپنڈی (این این آئی، مانیٹرنگ ڈیسک) سابق وزیر داخلہ شیخ رشید نے عمران خان کو الوداع کہنے کی خبریں مسترد کر دیں ۔ ایک صحافی کی جانب سے ٹوئٹر پر بڑا دعویٰ کیا گیا کہ شیخ رشید احمد نے عمران خان کو سیاسی طور پر الوداع کہہ دیا۔سابق وزیر داخلہ نے سوشل میڈیا پر پھیلائی جانے والی عمران خان کو الوداع کہنے کی خبروں پر اپنا واضح مؤقف ایک ٹوئٹ میں بیان کرتے
ہوئے کہاکہ یہ غلط ہے، میں عمران خان کے ساتھ ہوں۔خیال رہے کہ شیخ رشید نے کہا تھا کہ میرا پاکستان تحریک انصاف سے تعلق نہیں، میں عمران خان کے ساتھ کھڑا ہوں، اس عمر میں جتنی طاقت رہ گئی ہے، اللّٰہ کے بعد عمران خان کیلئے ہے۔واضح رہے کہ ٹوئٹر پر جیو نیوز کے رپورٹر وقار ستی نے دعویٰ کیا ہے کہ شیخ رشید احمد نے عمران خان کو سیاسی طورپر الوداع کہہ دیاہے۔علاوہ ازیں عوامی مسلم لیگ کے رہنما شیخ رشید نے کہا ہے کہ ڈی جی آئی ایس پی آر اعلامیہ میں مجھے گھیسٹ کرمعاملے کو دوبارہ زندہ کررہے ہیں۔شیخ رشید نے ٹوئٹرپربیان میں کہا کہ (ن )کی جگہ ش کو لانا ماسٹر پلان تھا،ن لیگ صرف ٹی وی شو کے لیے ہے۔ انہوں نے کہاکہ ڈی جی آئی ایس پی آر اعلامیہ کی سازش میں مجھے گھسیٹ کر معاملے کو دوبارہ زندہ کر رہے ہیں۔ انہوں نے کہاکہ ہر میٹنگ کے منٹس ہوتے ہیں اور اس کی پریس ریلیز سب کی منظوری سے جاری ہوتی ہے۔سابق وزیر داخلہ نے کہا کہ حالات کی سنگینی پر میں عنقریب سپریم کورٹ جا سکتا ہوں۔
انہوں نے کہا کہ ڈاکو راج نے پیٹرول کی قیمت میں 24 روپے فی لیٹر اورڈیزل کی قیمت میں 60 روپے فی لیٹر اضافہ کرکے غریب کو دو ہفتوں میں تیسرا ٹیکہ لگایا ہے،حکومت اپنے کیسز ختم اور مخالفین پر دہشت گردی کے جھوٹے کیسز بنا رہی ہے۔انہوں نے کہاکہ ساری قوم کی نظریں اب سپریم کورٹ کی طرف ہیں،اگر فیصلہ سڑکوں پر ہونا ہے تو فیصلہ 45 دنوں میں کچھ بھی ہو سکتا ہے۔
شیخ رشید نے کہاکہ آصف زرداری غیر ملکی ایجنڈے پر لنگڑی لولی قومی اسمبلی سے خوفناک کام لینے والے ہیں۔امپورٹد اور چور دروازے کی اسمبلی میں بجٹ پر تقریر کرنے والا کوئی نہیں۔پنجاب اسمبلی میں منحرف اراکین غیر آئینی بجٹ پاس کر رہے ہیں۔غیر آئینی فیصلے،معیشت کی تباہی پر ملک عنقریب بہت بڑے فیصلے کا منتظر ہے۔
