نارووال(این این آئی) وفاقی وزیر پلاننگ اینڈ ڈیولپمنٹ احسن اقبال نے کہا ہے کہ موٹر وے کے ذریعے کرتار پور کو ننکانہ صاحب کے ساتھ منسلک کر رہے ہیں،سیالکوٹ ایئرپورٹ سے براہ راست لنک روڈ کرتار پور تک آئے گا بیرون ملک سے آنے والے زائرین آسانی سے پہنچ سکیں گے۔ان خیالات کا اظہار وفاقی وزیر پلاننگ اینڈ ڈیولپمنٹ احسن اقبال نے کرتار پور کوریڈور کے دورہ کے دوران کیا۔ انہوںنے کہاکہ پاکستان بین المذاہب دھرتی ہے یہاں پر تمام مذاہب کے لوگ بستے ہیں ۔ہم تمام مقدس مقامات کا احترام کرتے ہیں۔کرتار پوربابا گرونانک کی ایک ایسی بستی ہے جس میں امن محبت کی صدا بلند ہوتی ہے۔انہوں نے کہا کہ ہم چاہتے ہیں کہ پوری دنیا سے سکھ یاتری پاکستان آئیں اورمقدس مقام کی زیارت کریں ۔ حکومت پاکستان سکھ یاتریوں کو زیادہ سے زیادہ سہولیات فراہم کر رہی ہے۔ ہم سب تمام مذاہب کے درمیان پاکستان کے اندر محبت اخوت کو مضبوط کرنے کے لئے کوشاں ہیں۔