ماسکو(این این آئی)روسی فیڈریشن کے ڈوما کے اسپیکر ویاچسلاو ولوڈن کی جانب سے چند روز قبل اعلان کیا گیا تھا کہ روس کی جانب سے یورپی عدالت برائے انسانی حقوق کے فیصلوں پر عمل درآمد نہ کرنے کے قوانین کو اپنانے کا ارادہ ہے۔
اس حوالے سے مزید پیش رفت سامنے آئی ہے۔ روسی صدر ولادیمیر پوتین نے اس فیصلے پر دستخط کیے ہیں جس میں کہا گیا ہے کہ یورپی عدالت برائے انسانی حقوق کے فیصلوں پر روس میں عمل درآمد نہیں کیا جائے گا۔میڈیارپورٹس کے مطابق پوتین نے یورپی عدالت برائے انسانی حقوق کے ان فیصلوں پرعمل درآمد روک دیا ہے، جو 15 مارچ کے بعد منظور کیے گئے تھے۔ پندرہ مارچ کو روس نے یورپ کی کونسل سے دستبرداری کی درخواست جمع کرائی تھی۔ فیصلے کے مطابق یورپی عدالت برائے انسانی حقوق کے فیصلے روسی عدالتوں کے فیصلوں کو تبدیل نہیں کریں گے اور معاوضہ صرف روبل اور روسی بینکوں میں موجود کھاتوں میں ادا کیا جائے گا۔دوسری طرف روسی پراسیکیوٹر جنرل کا دفتر اگلے سال تک درخواست گزار کو مالی معاوضہ ادا کر سکتا ہے۔
