اسلام آباد(این این آئی)آڈیٹر جنرل نے تحریک انصاف دور میں خیبر پختونخوا انفارمیشن ٹیکنالوجی بورڈ میں بھرتی کیے گئے 19 افسران کی بھرتیاں غیر قانونی قرار دے دیں۔

آڈیٹر جنرل نے رپورٹ میں قرار دیا کہ بھرتی کیلئے شارٹ لسٹنگ اور سلیکشن کا عمل شفاف نہیں تھا۔آڈیٹر جنرل نے ذمہ داروں کے تعین کیلئے اعلیٰ سطح کی تحقیقات کی سفارش کی ہے

اور کہا ہے کہ ملازمین کی برطرفی اور ریکوری کی جائے۔رپورٹ میں کہا گیا کہ تحریک انصاف کی موجودہ اور سابق حکومت نے افسروں کو بھرتی کیا،

کے پی آئی ٹی بورڈ میں پرکشش تنخواہوں پر منیجنگ ڈائریکٹر اور ڈائریکٹرزبھرتی ہوئے۔آڈیٹر جنرل کی رپورٹ کے مطابق بورڈ کے اکاؤنٹس میں 36 کروڑ 50 لاکھ روپے کی سنگین بے ضابطگیاں بھی سامنے آئی ہیں۔

بورڈ کے ایم ڈی صاحبزادہ محمد علی نے کہاکہ آڈٹ رپورٹ ابتدائی اعتراضات پرمشتمل ہے اور کئی اعتراضات کا جواب دیا ہے، باقی اعتراضات بھی دور کریں گے۔